សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់រងរបួសបែកក្បាលស្លាប់ភ្លាម ខណៈដែលជួបករណីគ្រោះថ្នាក់ចរាចរណ៍ជិះម៉ូតូ ឆ្លងផ្លូវខ្វះការប្រុងប្រយ័ត្ន ក៏ត្រូវរថយន្តមិនស្គាល់ម៉ាកបើកបុកយ៉ាងពេញទំហឹងលាន់សូរដូចរន្ទះ បង្កការភ្ញាក់ផ្អើលដល់អ្នកភូមិកំពុងដេកលង់លក់ ក្នុងដំណេកចេញមកមើល និងរាយការណ៍មកសមត្ថកិច្ចមូលដ្ឋានទាំងយប់អធ្រាត ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីថ្ងៃទី២២ ខែវិច្ឆិកា ឆ្នាំ២០១៨ វេលាម៉ោង១១និង៤៥នាទី នៅលើផ្លូវជាតិលេខ១ ចន្លោះគីឡូម៉ែត្រលេខ107-108 ចំណុចភូមិគោកកណ្ដោល ឃុំក្រោលគោ ស្រុកស្វាយជ្រំ ខេត្តស្វាយរៀង ។
បើតាមសមត្ថកិច្ចនគរបាលស្រុកស្វាយជ្រំបានឲ្យដឹងថា បុរសដែលស្លាប់មានឈ្មោះ ទៀស ចាន់ធី អាយុ២៣ឆ្នាំ ជនជាតិខ្មែរ មុខរបរសិស្ស រស់នៅភូមិដូនលែប ឃុំគោកព្រីង ស្រុកស្វាយជ្រំ ខេត្តស្វាយរៀង ខណៈជិះម៉ូតូម៉ាក ហុងដា C125 ពណ៌ខ្មៅ ពាក់ស្លាកលេខ ស្វាយរៀង ១B៦៩៧០ ។
ចំណែកអ្នកបើករថយន្តមិនត្រូវបានស្គាល់ឈ្មោះនោះទេ ក្រោយកើតហេតុ បានបើករត់គេចបាត់ស្រមោល ភ្លាមៗផងដែរ ។
សមត្ថកិច្ចនគរបាលបានបន្តថា បុរសរងគ្រោះជិះម៉ូតូទិសខាងជើងទៅត្បូង ហើយឆ្លងផ្លូវ ស្រាប់តែមានរថយន្តមិនស្គាល់ម៉ាក បើកបរពីទិសខាងកើតទៅលិច លើកំណាត់ផ្លូវជាតិលេខ១ ចាប់ហ្វ្រាំងមិនទាន់ ក៏បុកគ្នាយ៉ាងពេញទំហឹងលាន់សូរដូចរន្ទះបង្កការភ្ញាក់ផ្អើលទាំងយប់តែម្ដង ។
បច្ចុប្បន្នសាកសពត្រូវបានសមត្ថកិច្ចមូលដ្ឋានប្រគល់ឲ្យក្រុមគ្រួសារយកទៅធ្វេីបុណ្យតាប្រពៃណី ៕ យឹម សុថាន
