សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានស្លាប់ភ្លាមៗយ៉ាងរន្ធត់ និងប្រពន្ធរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ខណៈដែលជិះម៉ូតូម៉ាកវ៉េវ ឌុបគ្នា២នាក់ប្តីប្រពន្ធហើយត្រូវរថយន្តកូរ៉េដឹកទឹកកករបស់ក្រុមហ៊ុនធុនតូចផលិតទឹកកក គឹម ឆៃហ៊ន បុកពេញទំហឹង រួចបើកគេចចូលទៅក្នុងក្រុមហ៊ុនរបស់ខ្លួន។
ហេតុការណ៍នេះកើតឡើងកាលពីវេលាម៉ោង៥ព្រឹក ថ្ងៃទី២៤ ខែវិច្ឆិកា ឆ្នាំ២០១៨ ស្ថិតនៅចំណុចផ្លូវវេងស្រេង ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
សមត្ថកិច្ចបានបញ្ជាក់ថា សពជនរងគ្រោះមានឈ្មោះ ប្រាក់ សំណាង ភេទប្រុស អាយុ៤៨ឆ្នាំ ស្នាក់នៅភូមិខ្លាកូន ឃុំពុទ្ធសារ ស្រុកបាទី ខេត្តតាកែវ។ ចំណែកប្រពន្ធរងរបួសធ្ងន់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។
យោងតាមប្រភពព័ត៌មានបានឲ្យដឹងថា មុនពេលកើតហេតុ គេឃើញរថយន្តដឹកទឹកកករបស់ក្រុមហ៊ុនធុនតូច ផលិតទឹកកក គឹម ឆៃហ៊ន ពាក់ស្លាកលេខ ភ្នំពេញ 2M-0417 បើកបរខ្វះការប្រុងប្រយត្ន័ បានបុកម៉ូតូម៉ាកវ៉េវ ពណ៌ក្រហម ពាក់ស្លាកលេខ ភ្នំពេញ 1AB-1644 ដែលកំពុងជិះឌុបគ្នាដោយ២នាក់ប្តីប្រពន្ធពេញទំហឹង បណ្តាលឲ្យបុរសជាប្តីស្លាប់ភ្លាមៗយ៉ាងរន្ធត់ និងប្រពន្ធរបួសធ្ងន់ត្រូវបានបញ្ជូនទៅមន្ទីរពេទ្យតែម្តង។
ក្រោយកើតហេតុ សមត្ថកិច្ចនគរបាលចរាចរណ៍ខណ្ឌមានជ័យ សហការជាមួយនគរបាលចរាចរណ៍ក្រុង បានចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ។ ចំណែកសពជនរងគ្រោះត្រូវបានសមត្ថកិច្ចប្រគល់ឲ្យគ្រួសារធ្វើបុណ្យតាមប្រពៃណីនៅឯស្រុកកំណើត៕
