រថយន្តក្រុមសង្រ្គោះបន្ទាន់ស្រុកបាទី បុកជាមួយរថយន្តដឹកទំនិញពេញទំហឹង បណ្ដាលឲ្យរបួសធ្ងន់ម្នាក់នៅផ្លូវ៦០ម៉ែត្រ

ភ្នំពេញ ៖ រថយន្តក្រសួងសុខាភិបាលស្រុកទន្លេបាទីបានបើកវ៉ាជ្រែង ជ្រុលទៅបុករថយន្តដឹកទំនិញដែលបើកបញ្រ្ចាសទិសគ្នា ចំពីមុខពេញទំហឹង បណ្តាលឲ្យរថយន្តទាំងពីរគ្រឿងគាប់ជាប់គ្នា និងធ្វើឲ្យព្រូរបស់រថយន្តដឹកទំនិញម្នាក់រងរបួសធ្ងន់ ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង២និង៤០នាទីរសៀល ថ្ងៃទី៨ ខែមករា ឆ្នាំ២០១៩ នៅតាមបណ្តោយផ្លូវ៦០ម៉ែត្រ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ រថយន្តរបស់ក្រសួងសុខាភិបាល មន្ទីរពេទ្យបង្អែកស្រុកបាទី មានស៊ីរ៉ែន និងពាក់ស្លាកលេខរដ្ឋ12 2-0500 បានបើកបរតាមបណ្ដោយផ្លូវ៦០ម៉ែត្រ ទិសដៅពីជើងទៅត្បូងក្នុងល្បឿនយ៉ាងលឿន ដោយគោលដៅចេញពីភ្នំពេញឆ្ពោះទៅស្រុកបាទីវិញ ពេលដែលមកដល់ចំណុចកើតហេតុខាងលើ ស្រាប់តែវ៉ារថយន្តមួយគ្រឿងផ្សេងទៀត ក៏ជ្រុលទៅបុក នឹងរថយន្តដឹកទំនិញ ម៉ាក ហុីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ3A-6285 ដែលបើកបញ្រ្ចាសទិសគ្នាចំពីមុខពេញទំហឹង បណ្តាលឲ្យរថយន្តទាំង២គ្រឿងទៅមុខលែងរួច ចំណែកឯតៃកុងរងថយន្តដឹកទំនិញបានរងរបួសធ្ងន់ ត្រូវបានរថយន្តសង្គ្រោះបន្ទាន់ដឹកយកទៅមន្ទីរពេទ្យភ្លាមៗ ។

ក្រោយពេលកើតហេតុ សមត្ថកិច្ចមូលដ្ឋានបានចុះវាស់វែងយករថយន្តទាំង២គ្រឿង យកទៅរក្សាទុកនៅការិយាល័យចរាចរណ៍គោក នៃស្នងការដ្ឋាននគរបាលរាជធានីភ្នំពេញ រង់ចាំឲ្យភាគីទាំងពីរចូលមកស្រាយគ្នាតាមនីតិវិធី ៕ ភារ៉ា ដង្កោ