ព័ត៌មានទាន់ហេតុការណ៍៖

រថយន្តបែនដឹកដីរុញបញ្ឆេះគោយន្តកែច្នៃក្រឡាប់សង្កត់រងការខូចខាតយ៉ាងដំណំ

ចែករំលែក៖

ខេត្តព្រៃវែង: មានឧប្បត្តិហេតុរថយន្តបែនដឹកដីមួយគ្រឿងនិងគោយន្តកែច្នៃ មួយគ្រឿង​បាន​ជ្រុលធ្លាក់សង្កត់លើគ្នា បណ្តាលឲ្យរងការខូចខាតយ៉ាងដំណំខណៈដែល គោយន្តខូច​កណ្តាល​ផ្លូវហើយហៅរថយន្តដឹកដីជួយរុញបញ្ឆេះម៉ាស៊ីន ធ្វើឲ្យភ្លាត់ស្នៀត​ក្រឡាប់​សង្កត់គ្នាតែម្តង តែសំណាងគ្មានគ្រោះថ្នាក់ដល់មនុស្សនោះទេ ។

ហេតុការណ៍នេះកើតឡើងនៅម៉ោង២និង៤៥នាទីរសៀល ថ្ងៃព្រហស្បតិ៍៤ កើត ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី៩ ខែមករា ឆ្នាំ២០១៩ លើផ្លូវជាតិលេខ១១ ភូមិបា​បោង ឃុំបាបោង ស្រុកពារក៍ ខេត្តព្រៃវែង។

មន្រ្តីនគរបាលស្រុកពាមរក៍បានឲ្យដឹងថា ករណីគ្រោះថ្នាក់ចរាចរណ៍នេះ ដោយសារគោយន្ត​កែ​ច្នៃ ពណ៌ក្រហម បើកបរដឹកស្រូវចេញពីស្រែ មកឈប់ក្រោមផ្លូវជាតិ (ផ្លូវចុះឡើងថ្នល់) ខណ:នោះក៏ស្រាប់តែមានរថយន្តបែនដឹកដីម៉ាកហ៊ីយ៉ាន់ដាយ ពណ៌លឿង គ្មានស្លាកលេខ បើកមកពីទិសខាងជើងទៅត្បូងមកជិតដល់ផ្លូវចុះឡើងថ្នល់ បានខូច ក៏ឲ្យរថយន្តបែនដឹកដី​មួយទៀតរុញបញ្ឆេះម៉ាស៊ីន ។ បន្ទាប់មករថយន្តនោះក៏បានជ្រុលធ្លាក់ពីលើថ្នល់​មកសង្កត់លើ​គោ​យន្តកែច្នៃតែម្តង តែសំណាងគ្មានអ្នករងរបួសនោះទេ។

ក្រោយកើតហេតុសមត្ថកិច្ចបានវាស់វែង យកវត្ថុតាងយានយន្តទាំងពីរគ្រឿងទៅរក្សាទុក​រង់ចាំដោះស្រាយគ្នាពេលក្រោយតាមច្បាប់៕ សហការី


ចែករំលែក៖