សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កង់បីប៉ះជាមួយរថយន្តនៅផ្លូវបែកជាបួនបន្តិចបន្តួច កើតជាជម្លោះឈ្លោះគ្នាផ្អើលសមត្ថកិច្ច ។
ហេតុការណ៍នេះ កើតឡើងកាលពីម៉ោង ១១យប់ ថ្ងៃទី៤ ខែមករា ឆ្នាំ២០១៩ ស្ថិតនៅតាមបណ្ដោយផ្លូវលេខ១៥៤ កែងផ្លូវលេខ១៩ សង្កាត់ផ្សារកណ្ដាល១ ខណ្ឌដូនពេញ រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេល គេបានឃើញរថយន្តមួយគ្រឿងម៉ាក តូយូតា កាមរីបាឡែន ពណ៌ទឹកមាស ពាក់ស្លាកលេខ ភ្នំពេញ ២AJ-៧៧៦៥ ធ្វើដំណើរតាមបណ្តោយផ្លូវលេខ១៩ ក្នុងទិសដៅពីជើងទៅត្បូង ខណៈនោះក៏មានម៉ូតូកង់បី (Pass App) ពណ៌លឿង ពាក់ស្លាកលេខ ភ្នំពេញ ១HJ-០២០០ បើកបរដោយបុរសម្នាក់ ធ្វើដំណើរតាមបណ្តោយផ្លូវលេខ១៥៤ ក្នុងទិសដៅពីលើតទៅលិច បានជ្រុលទៅបុកគ្នាពេញទំហឹង បណ្ដាលឲ្យខូចខាតបន្តិចបន្តួច ហើយមិនគិតដោះស្រាយគ្នា បែរជាឈ្លោះគ្នាផ្អើលសមត្ថកិច្ច។
បន្ទាប់ពីកើតហេតុសមត្ថកិច្ចមូលរដ្ឋាន បានចុះមកដល់ចំណុចកើតហេតុ ទំនាក់ទំនងសមត្ថកិច្ចជំនាញចរាចរចុះមកវាស់វែងយក រថយន្ត និងកង់បីទៅរក្សាទុកជាបណ្ដោះអាសន្ននៅការិយាល័យចរាចរផ្លូវគោក នៃស្នងការដ្ឋនានគរបាលរាជធានីភ្នំពេញ រង់ចាំការដោះស្រាយគ្នានៅពេលក្រោយ ៕ ជ្រោយពេជ្រ
