សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារីម្នាក់ញៀនល្បែងខ្លាំងពេក ដាច់លុយលួចម៉ូតូអ្នក ស្នាក់នៅបន្ទប់ខុនដូជាមួយគ្នាយកទៅបញ្ចាំលេងល្បែងចាញ់អស់ ត្រូវសមត្ថកិច្ចឃាត់ខ្លួនកាលពីម៉ោង៥៖៣០នាទីល្ងាច ថ្ងៃទី១៧ ខែកុម្ភៈ ឆ្នាំ២០១៩ នៅចំណុចខុនដូមួយកន្លែង ស្ថិតនៅតាមផ្លូវ៤៤៤ ស្ថិតនៅភូមិ២ សង្កាត់ទួលទំពូងទី២ ខណ្ឌចំការមន រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យឈ្មោះ ខៀវ រិទ្ធដាណា អាយុ២០ឆ្នាំ មុខរបរនៅផ្ទះ ស្នាក់នៅខុនដូជាមួយគ្នាជាន់ទី២ សង្កាត់ទួលទំពូង២ ខណ្ឌចំការមន និងមានស្រុកកំណើត នៅសង្កាត់ចតុមុខ ខណ្ឌដូនពេញ ។ ចំណែក ជនរងគ្រោះមានឈ្មោះ ចាន់ វិជ្ជរ៉ា ភេទស្រី អាយុ២៦ឆ្នាំ មុខរបរ បុគ្គលិកក្រុមហ៊ុន ស្នាក់នៅខុនដូរជាន់ទី៦ តាមផ្លូវ៤៤៤ ស្ថិតនៅភូមិ២ សង្កាត់ទួលទំពូងទី២ ខណ្ឌចំការមន ភ្នំពេញ ។
សមត្ថកិច្ចបានប្រាប់ឲ្យដឹងថា មាននារីរងគ្រោះបានដាក់ពាក្យបណ្ដឹងនៅម៉ោង១០៖៣០នាទីព្រឹក ថ្ងៃទី១៧ ខែកុម្ភៈ ឆ្នាំ២០១៩ ដោយទុកម៉ូតូម៉ាកហុងដា ZOOMER-X ពណ៌ទឹកប្រាក់ ពាក់ស្លាកលេខ ភ្នំពេញ 1FL-3878 នៅជាន់ផ្ទាល់ដីហើយបាត់ តែមិនដឹងថាចោរលួចនៅថ្ងៃណាទេ ដោយសារគាត់មានអការមិនស្រួលខ្លួន មិនបានជិះម៉ូតូទៅធ្វើការក្រោយមក ក៏សមត្ថកិច្ចចុះត្រួតពិនិត្យ កន្លែងកើតហេតុរួចក៏ទទួលពាក្យបណ្ដឹងជនរងគ្រោះ។
សមត្ថកិច្ចបន្តថា ក្រោយពីចុះស្រាវជ្រាវ និងមើលកាមេរ៉ាសុវត្ថិភាពនៅខុនដូ បានបង្ហាញពីសកម្មភាព នារីជនសង្ស័យ ដែលជាអ្នកស្នាក់នៅក្នុងខុនដូ ដូចគ្នា ជាអ្នកបើកម៉ូតូ ZOOMER-X យកចេញទៅ និងសាកសួរនាំសាក្សីសន្តិសុខ ដែលយាមនៅខុនដូរហូតមក ដល់ម៉ោង៥និង៣០នាទីល្ងាច ថ្ងៃទី១៧ ខែកុម្ភៈ ឆ្នាំ២០១៩ ជនរងគ្រោះបានចាប់នារីជនសង្ស័យប្រគល់ឲ្យសមត្ថកិច្ចប៉ុស្តិ៍នគរបាលទួលទំពូង២ និងស្នើឲ្យសមត្ថកិច្ចចាត់ការតាមផ្លូវច្បាប់។
សមត្ថកិច្ចសាកសួរនាំនារីនារីដែលជាជនសង្ស័យនោះ បានឆ្លើយសារភាពថា មកពីខ្លួនអត់លុយចាយ ព្រោះចាញ់ល្បែងខ្លាំងពេក ក៏ឃើញជនរងគ្រោះដេក មិនចេញពីបន្ទប់ណាមួយសន្តិសុខនៅខុនដូផ្លាស់ប្ដូរថ្មី ទើបនាងហៅជាងសោម៉ូតូ មកចំលងសោថ្មី ក្រោយពីជាងចំលងសោរួច នាងបើកម៉ូតូអ្នករងគ្រោះយកទៅដាក់បញ្ចាំ ក្នុងតំលៃ៦០០ដុល្លារ ហើយយកទៅលេងល្បែងទៀត លុះចាញ់ខ្ទេចអស់ ហើយក៏មិនដឹងគេចខ្លួនទៅណារួច ក៏ត្រឡប់ចូលទៅខុនដូវិញ កុំឲ្យគេសង្ស័យ តែរហូតមកដល់ថ្ងៃកើតហេតុ ទើបនារីរងគ្រោះ មកឃាត់ខ្លួននាងប្រគល់អោយសមត្ថកិច្ចតែម្ដង។
សមត្ថកិច្ចបញ្ជាក់ថា ក្រោយពីជនរងគ្រោះបានឃាត់ខ្លួន ដោយភ័យខ្លាចជាប់គុក រូបនាងក៏ឲ្យក្រុមគ្រួសារយកលុយ ទៅលស់ ម៉ូតូចេញពីកន្លែងបញ្ចាំវិញ រួចប្រគល់ម៉ូតូឲ្យម្ចាស់គេវិញហើយ ដើម្បីឲ្យជនរងគ្រោះដកពាក្យបណ្ដឹង តែយ៉ាងណាក៏ដោយ ទោះជាជនរងគ្រោះបានម៉ូតូវិញ ក៏សមត្ថកិច្ចប៉ុស្តិ៍នគរបាលទួលទំពូង២ នៅតែឃាត់ខ្លួននារីរូបនេះ ពីបទលួចម៉ូតូដដែល។
បច្ចុប្បន្ននារីសង្ស័យ ត្រូវបានសមត្ថកិច្ចប៉ុស្តិ៍ទួលទំពូង២ កសាងសំណុំរឿង បញ្ជូលទៅកាន់អធិការដ្ឋាននគរបាលខណ្ឌចំការមន ចាត់ការបន្តតាមនីតិវិធី ៕ ជ្រោយពេជ្រ
