សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ទំនងជាស្រវឹងស្រាបើករថយន្តលឿន មកដល់ផ្លូវបំបែកជ្រុចង្កូតទៅបុកចូលសំយ៉ាបផ្ទះប្រជាពលរដ្ឋ បង្កឲ្យមានការភ្ញាក់ផ្អើលឡើងកាលពីម៉ោងរំលងអធ្រាត្រ ឈានចូលថ្ងៃ ច័ន្ទ ទី២៥ ខែមីនា ឆ្នាំ២០១៩ តាមបណ្ដោយផ្លូវលេខ៣៤៩ កែងនឹងផ្លូវលេខ៣៥១ ខាងក្រោយសាលាអន្តរជាតិប៊ែលធី ស្ថិតក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់បើកបររថយន្តមួយគ្រឿងម៉ាក តូយូតាព្រូស ពណ៌ខៀវខ្ចី ពាក់ស្លាកលេខ ភ្នំពេញ 2AV-8616 ទំនងជាស្រវឹងស្រាបានបើកតាមបណ្ដោយផ្លូវលេខ៣៤៩ក្នុង ទិសដៅពីកើតទៅលិច យ៉ាងលឿន ។
ខណៈមកដល់ចំណុចកើតហេតុដែលជាផ្លូវបំបែកច្រមុះជ្រូក ស្រាប់តែរថយន្តបានបួងចង្កូតជ្រុលទៅបុកសំយ៉ាបផ្ទះ ដែលសង់ពីឈើប្រកស័ង្កសីទំហំប្រមាណ៤ម៉ែត្រគុណនឹង២ម៉ែត្រ សម្រាប់ទុកសម្ភារប្រើប្រាស់ដូចចានឆ្នាំង និងរទេះដាក់ម្ហូបសម្រាប់យកទៅលក់នៅខាងមុខរោងចក្រ បណ្តាលឲ្យបាក់ស្រុតធ្លាក់មកក្រោមរងការខូចខាតស្ទើរតែទាំងស្រុង ចំណែកឯរថយន្តបង្កបានរងការខូចខាតក្រពឹតកាងខាងមុខ និងឆ្កូតថ្នាំបន្តិចបន្តួច ប៉ុន្តែមិនបង្កឲ្យមាននរណាម្នាក់រងរបួសនោះទេ ។
បន្ទាប់ពីកើតហេតុសមត្ថកិច្ចមូលដ្ឋាន និងសមត្ថកិច្ចជំនាញចរាចរចុះមកដល់កន្លែងកើតហេតុ ហើយក៏មានតំណាងភាគីខាងរថយន្តបង្កបានចេញមុខមកដោះស្រាយជាមួយនឹងភាគីម្ចាស់ផ្ទះ សម្របសម្រួលដោះស្រាយគ្នាដោយភាគីរថយន្តបានចេញសំណងចំនួន៦០០ដុល្លារឲ្យទៅភាគីម្ចាស់ផ្ទះដើម្បីបញ្ចប់រឿងនៅនឹងកន្លែងកើតហេតុ ៕ ជ្រោយពេជ្រ
