រថយន្តបាឡែន បោះពួយបុកស្ពាន ចូលផ្ទះពលរដ្ឋក្បែរផ្លូវ ស្លាប់ពីរនាក់ ពូ ក្មួយ និងម៉ែក្មេក ឪក្មេក រងរបួសធ្ងន់

ខេត្តក្រចេះ៖ រថយន្តបាឡែនមួយគ្រឿង បោះពួយយ៉ាងលឿន រេចង្កូតធ្លាក់ផ្លូវបោលបំបុកបង្កាន់ដៃស្ពាន ឡើងផ្ទះប្រជាពលរដ្ឋ នៅក្បែរផ្លូវ បណ្តាលឲ្យមនុស្សពីរនាក់ បានស្លាប់ភ្លាមៗនៅកន្លែងកើតហេតុ និងពីរនាក់ទៀតរងរបួសធ្ងន់ ។

ហេតុការណ៍ គ្រោះថ្នាក់ចរាចរណ៍ដ៏រន្ធត់មួយនេះ បានកើតឡើងវេលាម៉ោង៤រសៀល ថ្ងៃពុធ១៤ រោច ខែផល្គុន ឆ្នាំចសំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី៣ ខែមេសា ឆ្នាំ២០១៩ នៅត្រង់ចំណុចភូមិអូរតាណឹង ឃុំក្បាលដំរីស្រុកសំបូរ ខេត្តក្រចេះ ។

ប្រភពបានឲ្យដឹងថា ក្នុងគ្រោះថ្នាក់នេះ បណ្តាលឲ្យបាត់បងអាយុជីវិតពីរនាក់ ពូ និងក្មួយ និងពីរនាក់ទៀតរងរបួសធ្ងន់បាក់ដៃទាំងពីរនាក់ត្រូវជាឪពុកក្មេក និងម្តាយក្មេក ។ ប្រភពបន្តថា ជនរងគ្រោះបាត់បងជីវិតទី ១.ឈ្មោះ ប៊ិន ស៊ីណា ភេទប្រុស អាយុ៥០ឆ្នាំ ជាអ្នកបើកបរ ។ ទី២.ឈ្មោះ ប៊ិន ម៉េងហ៊ាង ភេទប្រុស ត្រូវជាក្មួយ ។ អ្នកទាំងអស់គ្នារស់នៅក្នុងភូមិ កំរើល ឃុំកំរើល ស្រុកអូររាំងឪ ខេត្តត្បូងឃ្មុំ ។

រថយន្តដែលគ្រោះថ្នាក់នោះម៉ាកបាឡែនពាក់ ស្លាកលេខ ២AR ៥៨៩៣ ធ្វើដំណើរឆ្ពោះទៅកាន់ខេត្តរតនគីរី ហើយក៏ជួបគ្រោះថ្នាក់នោះតែម្តង ។

ផ្ទះដែលរថយន្តបើកបរជ្រុលចង្កូតទៅបុកនឹងស្ពានជណ្តើរផ្ទះនោះឈ្មោះ គ្រូធី ។ ក្រោយកើតហេតុជនរងគ្រោះត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្ត ។

សមត្ថកិច្ចធ្វើកំណត់ហេតុប្រគល់សាកសពឲ្យសាច់ញាតិ ក្រុមគ្រួសារយកទៅធ្វើបុណ្យតាមប្រពៃណី នៅស្រុកកំណើតរបស់ជនរងគ្រោះ ៕ ជីវន្ត័