សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ រថយន្តធុនធំ ១គ្រឿង សមត្ថកិច្ចឃាត់ចាប់ឆែកឃើញសុទ្ធតែឈើ បន្ទាប់ពីអ្នកបើកបររថយន្ត ១គ្រឿងនេះ បានជ្រុលបុកប៉ារ៉ាស់ របស់សមត្ថកិច្ច ដែលកំពុងដាក់នៅគោលដៅ ។
ហេតុការណ៍ខាងលើនេះ បានកើតឡើងនៅវេលាម៉ោង៩ និង៤៥នាទីយប់ ថ្ងៃអង្អារ ៥កើត ខែចេត្រ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី៩ ខែមេសា ឆ្នាំ២០១៩ នៅលើកំណាត់ផ្លូវជាតិលេខ៥៥ ត្រង់ចំណុចមុខអធិការដ្ឋាននគរបាលស្រុកវាលវែង ស្ថិតក្នុងភូមិ.ឃុំប្រម៉ោយ ស្រុកវាលវែង ខេត្តពោធិ៍សាត់ ។
របាយការណ៍នគរបាលស្រុកវាលវែងឃើញថា រថយន្តធុនធំ ១គ្រឿងត្រូវបានកម្លាំងឃាត់ចាប់ម៉ាក ហុីយ៉ាន់ដាយ ពណ៌ស គ្មានស្លាកលេខ ដឹកឈើអារ បើកបរដោយឈ្មោះ ប៊ូ ឡង់ឌី ភេទប្រុស អាយុ ២៥ឆ្នាំ ជនជាតិខ្មែរ រស់នៅភូមិតាកែវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង ។
របាយការណ៍ដដែលខាងលើបន្តទៀតថា ចំពោះករណីនេះកម្លាំងធ្វើឡើង នៅគ្រាដែលកំពុងប្រតិបត្តិការ រថយន្តបង្កមិនបន្ថយល្បឿនទេ ថែមទាំងបុកប៉ារ៉ាស់របស់សមត្ថកិច្ចទៀត ដូច្នេះរថយន្តរួមទាំងឈើ និងបើកបរ នាំយកទៅបន្តនីតិវិធីនៅអធិការដ្ឋាននគរបាលស្រុកវាលវែង ៕ ប៉ឹម ពិន
