ម្នាក់ស្លាប់ ម្នាក់ទៀតរបួសធ្ងន់ និងខូចខាតម៉ូតូ១គ្រឿង រថយន្ត១គ្រឿង ក្នុងហេតុការណ៍ គ្រោះថ្នាក់ចរាចរ ម៉ូតូបុកនឹងរថយន្ត

ខេត្តកំពង់ធំ៖ គ្រោះថ្នាក់ចរាចរណ៍ម៉ូតូ បុកនឹងរថយន្តបើកបរឆ្លងកាត់ផ្លូវ បណ្តាលឲ្យបុរសម្នាក់ស្លាប់ និងស្រ្ដីម្នាក់ទៀត របួសស្រាល ខូចខាតម៉ូតូ១គ្រឿង និង រថយន្ត១គ្រឿង កាលពីថ្ងៃអង្គារ ១២កើត ខែចេត្រ ឆ្នាំកុរ ព.ស ២៥៦៣ ត្រូវនឹងថ្ងៃទី១៦ ខែមេសា ឆ្នាំ២០១៩ វេលាម៉ោង១៨និង០០នាទី លើកំណាត់ផ្លូវជាតិលេខ៦ ចំណុចមុខក្លោងទ្វារសំពៅមាស សំពៅប្រាក់ ភូមិពោធិ៍ខាវ ឃុំត្បូងក្រពើ ស្រុកសន្ទុក ខេត្តកំពង់ធំ ។

សមត្ថកិច្ចបានឲ្យដឹងថា រថយន្តម៉ាកកាមរី (បាឡែន) ពណ៌ទឹកប្រាក់ ស្លាកលេខភ្នំពេញ 2AS.1850 (បើកបរឆ្លងកាត់ផ្លូវ) អ្នកបើកបរមិនស្គាល់អត្តសញ្ញាណ បានបើករថយន្តគេចចេញពីកន្លែងកើតហេតុ យកទៅចតចោសនៅមាត់ស្ទឹងសែន ភូមិបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែន ហើយរត់គេចខ្លួនបាត់។

ចំណែកម៉ូតូម៉ាកហុងដា ឌ្រឹម ពណ៌ខ្មៅ ស្លាកលេខ កំពង់ធំ 1F.7902 (បើកបរផ្លូវត្រង់ពីត្បូងទៅជើង) ដោយឈ្មោះ ម៉ម សុខា ភេទប្រុស អាយុ៥៨ឆ្នាំ (មុខរបរលក់បាយ) នៅភូមិចតុលោក ឃុំបារាយណ៍ ស្រុកបារាយណ៍ ខេត្តកំពង់ធំ ស្លាប់នៅមន្ទីរពេទ្យឯកជន៥១៥ ខេត្តកំពង់ធំ (ពាក់មួកសុវិត្ថភាព)។ ឌុបប្រពន្ធឈ្មោះ ឌិន ចាន់ថុល អាយុ៥៥ឆ្នាំ មុខរបរលក់បាយ របួសស្រាល (ពាក់មួកសុវត្ថិភាព)។

មូលហេតុបង្កដោយអ្នកបើកបររថយន្ត បើកបរឆ្លងកាត់ផ្លូវខ្ជីខ្ជារខ្វះការប្រុងប្រយ័ត្ន ។

ក្រោយកើតហេតុ សមត្ថកិច្ចបញ្ជូនជនរងគ្រោះទៅមន្ទីរពេទ្យ និងចុះវាស់វែងប្រមូលវត្ថុតាងយកមករក្សាទុកនៅស្នងការដ្ឋាននគរបាលខេត្តកំពង់ធំ បើកការស៊ីបអង្គេត ចាត់ការតាមក្រោយ ៕ ប៊ុនរិទ្ធី