សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ នៅថ្ងៃទី៣០ ខែមេសា ឆ្នាំ២០១៩ វេលាម៉ោង១៤ និង០០នាទី ការិយាល័យព្រហ្មទណ្ឌកម្រិតស្រាល បានទទួលជនសង្ស័យ ជាជនជាតិចិន០១នាក់ ពីប្រធានសន្តិសុខក្រុមហ៊ុន អូរស្មាច់រីស៊ត ដែលត្រូវបានខាងក្រុមហ៊ុនឃាត់ ពីបទលួច (លួចលុយក្រុមហ៊ុនចំនួន៤០ម៉ឺនយ័នលុយចិន )។
ជនសង្ស័យ មាន ឈ្មោះ Yu Wentong ភេទប្រុស អាយុ២៨ឆ្នាំ ជនជាតិចិន មុខរបរមកសុំបម្រើការនៅក្រុមហ៊ុន ។
សមត្ថកិច្ចបានឲ្យដឹងថា ករណីនេះ ដោយមានការអនុញ្ញាតពី លោក កូយ កាន់យ៉ា ព្រះរាជអាជ្ញាអមសាលាដំបូងឲ្យឃាត់ ដើម្បីសាកសួរ ។
សមត្ថកិច្ចបានឲ្យដឹងទៀតថា ឆ្លងតាមការសាកសួរ ជនសង្ស័យ បានសារភាពថា ខ្លួនពិតជាបានប្រព្រឹត្តអំពើលួចដូចការចោទប្រកាន់មែន ដោយបានធ្វើសកម្មភាពលួច តាមរយៈគណនីធនាគារ ក្រុមហ៊ុន ដែលបានផ្តល់កាត ដែលមានសាច់ប្រាក់ សរុបចំនួន៤០ម៉ឺនយ័ន ស្មើប្រមាណប្រាំម៉ឺនដុល្លារ តែការលួចនេះ បានធ្វើឡើងនៅប្រទេសចិនឯណោះ មុនពេលខ្លួនមកសុំបម្រើការនៅក្រុមហ៊ុន នៅស្រុកខ្មែរ គឺ មិនមែនប្រព្រឹត្តនៅលើទឹកដីកម្ពុជានោះទេ ។
បច្ចុប្បន្ន ករណីនេះ ជំនាញកំពុងដំណើរការតាមនីតិវិធី៕ ប៉ែន នួន
