សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តស៊េរីទំនើបមួយគ្រឿងម៉ាក មាស្ទាំង បើកលឿនដល់ចំណុចផ្លូវកែងមិនបន្ថយល្បឿនជ្រុលបុករថយន្តម៉ាកហ៊ីយ៉ាន់ដាយពីចំហៀង ពេញទំហឹងបណ្តាលឲ្យខ្ទាតទៅបុកបង្គោលភ្លើងរងការខូចខាត កាលពីវេលាម៉ោង១១ និង១០នាទីយប់ ថ្ងៃទី៣ ខែឧសភា ឆ្នាំ២០១៩ នៅចំណុចផ្លូវលេខ៣០២ កែងផ្លូវ៥៧ ស្ថិតក្នុង សង្កាត់បឹងកេងកងទី១ ខណ្ឌចំការមន ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តហ៊ីយ៉ាន់ដាយពណ៌ស ពាក់ស្លាកលេខ ភ្នំពេញ2AN 8832 បើកបរដោយបុរសជនជាតិចិន ធ្វើដំណើរតាមបណ្តោយផ្លូវលេខ៥៧ ក្នុងទិសដៅពីជើងទៅត្បូង ខណៈមកដល់ចំណុចកើតហេតុ ស្រាប់តែមានរថយន្តស៊េរីទំនើប ម៉ាកមាស្ទាំង ពណ៌ក្រហម មិនមានស្លាកលេខ ធ្វើដំណើរតាមបណ្តោយផ្លូវលេខ៣០២ ក្នុងទិសដៅពីកើតទៅលិចហើយ បានបុករថយន្តហ៊ីយ៉ាន់ដាយចំពាក់កណ្តាលរថយន្តពេញទំហឹង បណ្តាលឲ្យរថយន្តហ៊ីយ៉ាន់ដាយជ្រុលទៅបុកបង្គោលភ្លើងរងការខូចខាត ចំណែករថយន្តរងការខូចខាតទាំងសងខាង ។
ក្រោយពេលកើតហេតុ សមត្ថកិច្ចចុះមកដល់ចំណុចកើតហេតុ និងមានអ្នកតំណាងភាគីខាងរថយន្តហ៊ីយ៉ាន់ដាយ មកសម្រួលស្រាប់តែប្រកែកគ្នាតឹងសរសៃកដាក់គ្នា បន្ទាប់មកបក្ខពួកខាងរថយន្តស៊េរី ទំនើបបើករថយន្តចេញទៅបាត់អស់ ទើបភាគីខាងរថយន្តរងគ្រោះយកទៅជួសជុលខ្លួនឯង ៕ សុខាសែនជ័យ
