សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី៖ ក្រុមជនជាតិភាគតិចប្រហែលជិត៤០នាក់ (ប្រុស២០នាក់) បាននាំគ្នាប្រមូលផ្តុំនៅចំណុចព្រៃចាក់ ភូមិរវាក់ ឃុំរយ៉ ស្រុកកោះញែក ខេត្តមណ្ឌលគិរី ក្រោមលេសថាដើរល្បាតដើម្បីមើលសកម្មភាពនៃការកាប់បំផ្លាញព្រៃឈើ ។ ប៉ុន្តែមន្ត្រីនៅក្នុងតំបន់អះអាងថា ក្រុមជនជាតិភាគតិចទាំងនោះមានបំណងចុះទៅបោះបង្គោលកាន់កាប់ដីព្រៃដោយខុសច្បាប់ ។ មន្ត្រីនៅទីនោះអះអាងថា ពួកគេបានប្រមូលផ្តុំគ្នាដើម្បីចាប់យកដីនៅក្នុងដែនជម្រកសត្វព្រៃ ដែលមួយផ្នែកសិទ្ធិនៅក្នុងខេត្តមណ្ឌលគិរី និងមួយផ្នែកស្ថិតនៅក្នុងខេត្តរតនគិរី ។ គេចាត់ទុកទង្វើរបស់ក្រុមជនជាតិភាគតិចទាំងនេះ គឺខុសច្បាប់ ។
បណ្តាញសហគមន៍ជនជាតិដើមក្នុងខេត្តមណ្ឌលគិរី លោក ក្រើង តុលា បាននិយាយថា ប្រជាសហគមន៍ភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរីនាំគ្នាចុះល្បាតព្រៃឈើ ក៏ប្រទះឃើញបទល្មើសព្រៃឈើនៅក្នុងតំបន់ដែនជម្រកសត្វព្រៃភ្នំព្រេច ។ លោកថា កិច្ចការរបស់ជនជាតិដើមភាគតិច គឺការពារធនធានធម្មជាតិ ។ ប្រធានបណ្តាញសហគមន៍រូបនេះបន្ថែមថា យើងនាំគ្នាចុះល្បាតមានគ្នាជាង៦០នាក់ ដែលក្នុងនោះមានស្ត្រី៤២នាក់ ។
លោក ហាន សាខន នាយកដែនជម្រកសត្វព្រៃភ្នំព្រេច មានប្រសាសន៍ថា នៅថ្ងៃទី១ ខែឧសភា ឆ្នាំ២០១៩ កម្លាំងរបស់លោកចុះពិនិត្យទីតាំងដែលប្រជាពលរដ្ឋប្រមូលផ្តុំនៅចំណុចព្រៃចាស់ ស្ថិតនៅក្នុងភូមិរវាក់ ឃុំរយ៉ ស្រុកកោះញែក បានជួបប្រជាពលរដ្ឋ៣៥នាក់ ដែលកំពុងបោះបង្គោល ប៉ុនប៉ងយកដីព្រៃ ។ លោកបន្តថា «យើងបានណែនាំ និងផ្សព្វផ្សាយច្បាប់ស្តីពីតំបន់ការពារធម្មជាតិ ពីព្រោះថា ប្រជាពលរដ្ឋដែលចូលមកប្រមូលផ្តុំគ្នានោះ ដើម្បីចាប់យកដីនៅក្នុងដែនជម្រកសត្វព្រៃ ដែលជាតំបន់ស្នួល» ។
លោកនាយកដ្ឋានជម្រកសត្វព្រៃភ្នំព្រេចបានបន្ថែមថា ការដែលបងប្អូនប្រជាពលរដ្ឋមកទីនេះក្នុងគោលបំណងរស់នៅទីតាំងខាងលើមិនបាន
ទេ ព្រោះជាទង្វើខុសច្បាប់ ។ លោកបានព្យាយាមណែនាំ ដល់ប្រជាពលរដ្ឋទាំងនោះ គឺហាមចាប់យកដីនេះ ប៉ុន្តែប្រជាពលរដ្ឋទាំងនោះនិយាយថា ត្រូវតែយកដីនេះ ទៅតាមចិត្តចង់ ពីព្រោះ តាំងពីដើមរៀងមក ពួកគាត់តែងតែចល័តភូមិឋានជាធម្មតា ។
ប្រភពពីអាជ្ញាធរស្រុកកោះញែកបាននិយាយថា ចលនារបស់បណ្តាញសហគមន៍ជនជាតិដើមភាគីតិច ដឹកនាំដោយលោក ក្រើង តុលានោះ គឺដោយសារមានការញុះញង់ពីឈ្មួញណាមួយចង់បានដីនៅតំបន់នោះ ដូច្នេះក៏រុញឲ្យជនជាតិភាគតិចទៅបោះទីតាំងចង់បានដីនៅតំបន់ការពារ ។ ពេលដែលបានដីរស់នៅមួយរយៈហើយនោះ ពួកឈ្មួញនឹងទិញដីនោះពីជនជាតិភាគតិចទាំងនោះដើម្បីឲ្យក្លាយទៅជាដីស្របច្បាប់ ។ មន្ត្រីអាជ្ញាធរស្រុកកោះញែកបាននិយាយថា ក្រុមលោក ក្រើង តុលា ជាជនជាតិដើមភាគតិច ដែលបង្កប់នូវបញ្ហាផលប្រយោជន៍ដូចអ្វីដែលគេតែងនិយាយថា «ចាញ់បានលុយ ឈ្នះបានដី» ។
មន្ត្រីសាលាខេត្តមណ្ឌលគិរីអះអាងថា អាជ្ញាធរមានសមត្ថកិច្ចកំពុងស៊ើបអង្កេតបញ្ហានេះ ហើយអាចនឹងឈានទៅដល់ចាប់ខ្លួន មេខ្យល់ក្នុងចលនាបំផុសឲ្យជនជាតិដើមភាគតិចចុះទៅចាប់យកដីនៅតំបន់ការពារក្នុងស្រុកកោះញែកនោះ ។ ចរន្តនេះបើសិនជាមិនទប់ស្កាត់ឲ្យបានទាន់ពេលវេលាទេនោះ អាចនឹងបង្កឲ្យមានបញ្ហាឈឺក្បាលពិបាកដោះស្រាយទៅថ្ងៃក្រោយ ។ មន្ត្រីមានសមត្ថកិច្ចរំពឹងថា ស្ថាប័នជំនាញនានា រាប់ទាំងសាលាដំបូងខេត្តមណ្ឌលគិរីផង នឹងរួមចំណែកទប់ស្កាត់ភាពអនាធិបតេយ្យទាំងនេះឲ្យមានប្រសិទ្ធភាព ៕ ហេង សូរិយា
