សារព័ត៌មាន នគរវត្ត តែងតែនាំមុខគេជានិច្ច
ការពារសុវត្ថិភាពប្រធានាធិបតីអាមេរិក គឺជាអាទិភាព របស់ក្រុមសន្តិសុខ និងចារកិច្ចអាមេរិក ។ មិនតែប៉ុណ្ណោះអាមេរិក បានចាត់វិធានការតានតឹងបំផុត ចំពោះបុគ្គលរូបណាដែលបានគំរាមធ្វើឃាត ប្រធានាធិបតីអាមេរិក ។ ការជេរប្រមាថប្រធានាធិបតីអាមេរិក គឺជារឿងធម្មតា ប៉ុន្តែ ការគំរាមសម្លាប់ គឺជាទោសយ៉ាងធ្ងន់ បំផុត ។
ពេលថ្មីនេះ រដ្ឋអាជ្ញាអាមេរិក បានប្រកាសថា បុរសម្នាក់ប្រឈមមុខនឹងការជាប់ពន្ធនាគារ រយៈពេល១៤០ឆ្នាំ ពីបទគំរាមកំហែងសម្លាប់លោកប្រធានាធិបតី ដូណាល់ ត្រាំ និងបទល្មើសជាច្រើនផ្សេងទៀត ដូចជា ផ្ញើសារអេឡិចត្រូនិក គំរាមបំផ្ទុះគ្រាប់បែក ព្រមទាំងផ្ញើស្រោមសំបុត្រ មានផ្ទុកម្សៅពណ៌ស ជាដើម ។
សារព័ត៌មានអាមេរិក បានផ្សាយ នៅថ្ងៃទី១៣ ខែឧសភា ឆ្នាំ២០១៩ នេះថា បុរសដែលរងនូវការចោទប្រកាន់នោះ ឈ្មោះ Gary Gravelle អាយុ៥១ឆ្នាំ ត្រូវតុលាការរកឃើញថា បានប្រព្រឹត្តបទល្មើសចំនួន១៦ករណី ក្នុងនោះមានតាំងពីការគំរាមកំហែងលោកប្រធានាធិបតី កាលពីខែកញ្ញា ឆ្នាំ២០១៨ ដោយផ្ញើស្រោមសំបុត្រ មានផ្ទុកម្សៅពណ៌ស ព្រមទាំងលិខិតសរសេរដោយដៃ គំរាមថា «អ្នកឯងស្លាប់» ថែមទៀតផង ។
ប្រភពព័ត៌មានដដែល បានបន្តថា ជនសង័្សយម្នាក់នេះក៏ធ្លាប់ផ្ញើស្រោមសំបុត្រស្រដៀងគ្នានឹងស្រោមសំបុត្រឲ្យលោកប្រធានាធិបតីនោះ ទៅកាន់ទីសាលប្រជុំ ផ្ញើទៅកាន់ព្រះវិហារ ជាពិសេស ផ្ញើទៅកាន់ការិយាល័យសមាគមជាតិសម្រាប់ការអភិវឌ្ឍមនុស្ស (NAACP)តែម្តង។
មន្ត្រីជំនាញរបស់អាមេរិក បានបញ្ជាក់ថា ម្សៅពណ៌ស ដែលបុរសខាងលើនេះ ដាក់ក្នុងស្រោមសំបុត្រ ផ្ញើទៅកាន់គោលដៅទាំងអម្បាលម៉ាននោះ ជាប្រភេទម្សៅ Biotoxin ហើយម្សៅនេះមិនគំរាមកំហែងដល់អាយុជីវិតបានទេ។
ជនខាងលើនេះ ក៏ធ្លាប់ផ្ញើសារអេឡិចត្រូនិក និងទូរស័ព្ទគំរាម វាយប្រហារបំផ្ទុះគ្រាប់បែក នៅទីក្រុង វឺម៉ុង (Vermont), វ៉ាស៊ីនតោន (Washington) និងទីតាំងផ្សេងៗទៀតស្ថិតនៅក្នុងរដ្ឋ Connecticut មានដូចជា ទីតាំងអគាររបស់រដ្ឋាភិបាល និងអគារមណ្ឌលសុខភាពផ្លូវចិត្តជាដើម ។
ប្រភពព័ត៌មានដដែល បានបញ្ជាក់ទៀតថា បើសិនត្រូវបានតុលាការផ្តន្ទាទោសទាំង១៦ករណីនេះ ជនសង័្សយឈ្មោះ Gary Gravelle អាចនឹងត្រូវជាប់គុក យ៉ាងតិច១៤០ឆ្នាំ ។
សូមជម្រាបថា ជនសង័្សយឈ្មោះ Gary Gravelle កាលពីអំឡុងឆ្នាំ២០១៣ ត្រូវបានតុលាការផ្តន្ទាទោសម្តងរួមមកហើយ ក្រោមការចោទប្រកាន់ ពីបទ «ផ្ញើសារគំរាមកំហែង»។ ប៉ុន្ដែក្រោយមកតុលាការអាមេរិកបានដោះលែងមកវិញ ដោយដាក់ក្រោមការឃ្លាំមើល ពីក្រុមប៉ូលិសសហព័ន្ធ រហូតដល់ពេលត្រូវចាប់ខ្លួន កាលពីឆ្នាំ២០១៨ ក្រោមការចោទប្រកាន់សារជាថ្មី៕
