អគ្គិភ័យឆាបឆេះម៉ូតូមួយគ្រឿង បណ្ដាលឲ្យរងការខូចខាតស្ទើរទាំងស្រុង

អគ្គិភ័យឆាបឆេះម៉ូតូមួយគ្រឿង បណ្ដាលឲ្យរងការខូចខាតស្ទើរទាំងស្រុងបង្កឲ្យមានការភ្ញាក់ផ្អើលឡើង កាលពីម៉ោងរំលងអធ្រាត្រ ឈានចូលថ្ងៃទី៥ ខែមិថុនា ឆ្នាំ២០១៩ នៅតាមបណ្ដោយផ្លូវលេខ២៧១ កែង និងផ្លូវ១៥៦ ស្ថិតក្នុងសង្កាត់ទឹកល្អក់ទី២ ខណ្ឌទួលគោក ។

ប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសម្នាក់ បានបើកម៉ូតូមួយគ្រឿង ម៉ាកយ៉ាម៉ាហា ពណ៌ក្រហម ពាក់ស្លាកលេខ ម7158ភព1 ធ្វើដំណើរតាមបណ្ដោយផ្លូវលេខ២៧១ ក្នុងទិសដៅពីត្បូងទៅជើង ។ ខណៈមកដល់ចំណុចកើតហេតុ ម៉ូតូបានឈប់ចតអែបទៅចិញ្ចើមផ្លូវ ហើយអ្នកបើកម៉ូតូ បានចុះឱនទៅឆ្កឹះឆ្កៀល ម៉ាស៊ីនម៉ូតូទំនងជាខូច តែមិនដឹងថាម៉ូតូ ខូចអ្វីនោះទេ ។

បន្ទាប់មកអ្នកបើកម៉ូតូ បានឡើងទៅធាត់បញ្ឆេះម៉ាស៊ីន ស្រាប់តែកើតចេញជាអណ្ដាតភ្លើង ឆាបឆេះម៉ូតូយ៉ាងសន្ធោសន្ធៅ តែម្តង ។ ភ្លាមៗនោះ អ្នកបើកម៉ូតូ ប្រញាប់ប្រញាល់រត់ ទៅដួសទឹកមកជះពន្លត់ តែមិនរលត់នោះទេ ហើយក៏មានប្រជាពលរដ្ឋដែលរស់នៅក្បែរនោះ បាននាំគ្នាយកបំពង់ពន្លត់អគ្គិភ័យ មកបាញ់ពន្លត់អស់ចំនួន២បំពង់ ក៏រលត់ទៅវិញ ចំណែក ម៉ូតូបានរងការខូចខាតអស់ពាក់កណ្តាលផ្នែកខាងមុខ តែមិនបង្កឲ្យមានអ្នករងរបួស ឬឆេះរាលដាលដល់ផ្ទះប្រជាពលរដ្ឋនោះទេ ។

បន្ទាប់ពីកើតហេតុមត្ថកិច្ចមូលដ្ឋាន បានចុះមកដល់ទីតាំង ដោយមិនបង្កឲ្យឆាបឆេះ រាលដាលដល់ផ្ទះប្រជាពលរដ្ឋ សមត្ថកិច្ច បានអនុញ្ញាតឲ្យម្ចាស់ដឹកម៉ូតូខូចខាត ចេញពីកន្លែងកើតហេតុបាត់ទៅ ៕ ជ្រោយពេជ្រ