សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ឪពុកបង្កើតបានបោកកូននឹងសសរផ្ទះបាយ បណ្តាលឲ្យសន្លប់បាត់ស្មារតី ហើយកំពុងសង្រ្គោះបន្ទាន់នៅមន្ទីរពេទ្យកុមារ ។
ហេតុការណ៍នេះ កើតឡើងនៅវេលាម៉ោង ៧និង៣០នាទីព្រឹក ថ្ងៃទី២៧ ខែមិថុនា ឆ្នាំ២០១៩ ។
ជនសង្ស័យឈ្មោះ ផ្លាយ វិភាត់ ភេទប្រុស អាយុ ៣១ឆ្នាំ នៅភូមិតាប្រាក់ ឃុំមានជ័យ ស្រុកប្រាសាទបាគង ខេត្តសៀមរាប បានឈ្លោះប្រកែកគ្នាជាមួយប្រពន្ធ រឿងទិញបន្លែមិនល្អ យកមកធ្វើម្ហូប ឈ្លោះគ្នាមួយពីរ ហើយប្រពន្ធដើរទៅយកទឹក ប្តីចាប់លើកកូនរួចយកទៅបោកនឹងសសរផ្ទះបាយបណ្តាលឲ្យកូនសន្លប់មិនដឹងខ្លួន ថែមទាំងយកកាំបិត រកកាប់កូនទៀត ប៉ុន្តែបានបងប្អូនស្រែកឃាត់ទើបឈប់ ក្រោយមកបងប្អូនយកជនរងគ្រោះទៅសង្គ្រោះបន្ទាន់មន្ទីរពេទ្យកុមារ ចំណែកជនសង្ស័យបានរត់គេចខ្លួនបាត់ ។
ប្រភពបានបញ្ជាក់ថា បច្ចុប្បន្នក្មេងរងគ្រោះបានស្លាប់ហើយ ឈ្មោះ ផាង ផល្លា ភេទប្រុស អាយុ ១ឆ្នាំ២ខែ មានម្តាយឈ្មោះ សោម សុខុម អាយុ ២៨ឆ្នាំ នៅភូមិតាប្រាក់ ឃុំមានជ័យ ស្រុកប្រាសាទបាគង ខេត្តសៀមរាប ។
លោក ម៉ឹង ចន្ដា អធិការស្រុក ប្រាសាទបាគង បានឲ្យដឹងនៅរសៀលថ្ងៃទី២៨ ខែ មិថុនា ឆ្នាំ២០១៩ថា ក្មេងរងគ្រោះបានស្លាប់បាត់ហើយ នៅវេលាម៉ោង ១០និង៤០នាទីព្រឹក ថ្ងៃទី២៨ ខែមិថុនា ឆ្នាំ២០១៩នេះ ចំណែក ឪពុកកំណាចនោះកំពុងរត់គេច សមត្ថកិច្ចកំពុងតាមចាប់ ៕ ប៊ុនរិទ្ធី
