សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អ្នកសិល្បៈ ប្រុស ស្រី ល្បីឈ្មោះជាច្រើនបានលេចមុខក្នុងកម្មវិធីខួបកំណើតរបស់អ្នកផលិតកម្មវិធី លោក យ៉េម រ៉ូហ្វាត ។ កម្មវិធីនេះ ត្រូវបានរៀបចំធ្វើកាលពីរាត្រី ថ្ងៃទី៣ ខែកក្កដា ឆ្នាំ២០១៩ នៅភោជនីយដ្ឋានជេកឃុន ណាយ ។
លោក យ៉េប រ៉ូហ្វាត បានបញ្ជាក់ថា មិនមានគម្រោងរៀបចំកម្មវិធីខួបធំដុំទេគឺគ្រាន់តែជាការជួបជុំមិត្តភ័ក្កិបងប្អូន មិត្តរួមការងារ ។ អ្នកផលិតកម្មវិធីស្វែងយល់ពិសុខភាពរបស់អង្គការរ៉ាក់ រូបនេះបានបញ្ជាក់ដែរថា មានអ្នកសិល្បៈមិនដល់១០តុទេដែលលោកអញ្ជើញហើយក៏មិនចង់រំខានពួកគាត់ច្រើនដែរ ។ លោកថា កម្មវិធីនេះ ក៏ជាឱកាសជួបជុំកម្សាន្តសប្បាយរីករាយជាមួយសិល្បករ ពិសេសប្អូនៗដែលធ្លាប់រួមការងារសិល្បៈ និងសង្គមកន្លងមកជាមួយគ្នា ។
ពិធីកររូបនេះបញ្ជាក់ថា កន្លងមកលោកទទួលបានការស្រឡាញ់រាប់អានច្រើនពីសិល្បករ ក្រោយពីបានរួមគ្នាធ្វើកិច្ចការសិល្បៈទាំងការច្រៀង និងសម្តែង ហើយអ្វីដែលលោកចង់អរគុណពួកគាត់សម្រាប់ថ្ងៃខួបកំណើតនោះ គឺការចូលរួមក្នុងកិច្ចការងារសង្គមជាមួយលោក ក្នុងការផ្សព្វផ្សាយ អប់រំដល់កម្មករ កម្មការិនី នៅតាមបណ្តារោងចក្រជាច្រើន ទាំងនៅរាជធានីភ្នំពេញ និងបណ្តាខេត្តមួយចំនួនទៀត ។
លោករំពឹងដែរថា សិល្បករ និងមិត្តរួមការងារទាំងអស់ នឹងបន្តការស្រឡាញ់រាប់អានកាន់តែខ្លាំង និងរួមគ្នាលើកកម្ពស់សុខភាពប្រជាជនខ្មែរ តាមរយៈសកម្មភាពផ្សព្វផ្សាយ សម្តែង និងច្រៀង៕ វឌ្ឍនា
