សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនជាប់ចោទឈ្មោះ ឯម អេង ភេទប្រុស អាយុ៥២ឆ្នាំ ពាក់ព័ន្ធរឿងក្ដីក្លែងលិខិត (ក្លែងហត្ថលេខាសម្ដេចតេជោ ហ៊ុន សែន) ឆបោកប្រាក់ចំនួន ២៥ម៉ឺនដុល្លារអាមេរិក ពីព្រះអង្គម្ចាស់ ស៊ីសុវត្ថ ប៉ាណារ៉ាសេរីវុឌ្ឍនោះ កាលពីព្រឹកថ្ងៃព្រហស្បតិ៍ ៣កើត ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៤ ខែកក្កដា ឆ្នាំ២០១៩ លោក កូយ សៅ ចៅក្រមជំនុំជម្រះនៃសាលាដំបូងរាជធានីភ្នំពេញ បានប្រកាសសាលក្រមសម្រេចផ្តន្ទាទោសជនជាប់ចោទឈ្មោះ ឯម អេង ភេទប្រុស អាយុ៥២ឆ្នាំដាក់ពន្ធនាគារកំណត់ ៦ឆ្នាំ ក្រោមបទចោទប្រកាន់ ក្លែងលិខិតសាធារណៈនិងប្រើប្រាសលិខិតសាធារណៈក្លែងតាមមាត្រា៦២៦ នៃក្រមព្រហ្មទណ្ឌប្រព្រឹត្តកាលពីថ្ងៃទី២៧ ខែធ្នូ ឆ្នាំ២០១៧ នៅរាជធានីភ្នំពេញ ។
សូមបញ្ជាក់ថា រឿងក្ដីក្លែងលិខិត (ក្លែងហត្ថលេខាសម្ដេចតេជោ ហ៊ុនសែន) បានកើតឡើងនៅថ្ងៃទី២៧ ខែធ្នូ ឆ្នាំ២០១៧ ដែលផ្ដើមចេញពីព្រះអង្គម្ចាស់ ស៊ីសុវត្ថិ ប៉ាណារ៉ាសេរីវុឌ្ឍ អតីតរដ្ឋមន្ត្រីក្រសួងវប្បធម៌ ដែលបានចូលនិវត្តន៍ទៅហើយ ដោយលោកចង់បានដី និងផ្ទះមួយកន្លែងនៅក្បែរព្រះបរមរាជវាំង សម្រាប់រស់នៅផ្ទាល់ខ្លួន តែមិនដឹងធ្វើដូចម្ដេចដើម្បីសុំការយល់ព្រម ពីសម្ដេចតេជោ ហ៊ុន សែន ។
ពេលនោះព្រះអង្គម្ចាស់ បានជួបឈ្មោះ ឯម អេង ហើយឈ្មោះ ឯម អេងក៏បានធានាស្វែងរកលិខិត និងហត្ថលេខាបញ្ជាក់សម្រេចរបស់សម្ដេចតេជោ ហ៊ុន សែន ប៉ុន្តែត្រូវចំណាយលុយអស់ចំនួន ២៥ម៉ឺនដុល្លារទើបបាន ។ បន្ទាប់មកព្រះអង្គម្ចាស់ ស៊ីសុវត្ថ ប៉ាណារ៉ាសេរីវុឌ្ឍ ក៏បានយល់ព្រមប្រគល់ប្រាក់ចំនួន ២៥ម៉ឺនដុល្លារឲ្យ ឈ្មោះ ឯម អេង ដើម្បីធ្វើកិច្ចការនេះ ។
ក្រោយមកឈ្មោះ ឯម អេង ក៏បានយកលិខិតស្នើសុំដែលមានហត្ថលេខាបញ្ជាក់របស់សម្ដេចតេជោ ហ៊ុន សែន មកប្រគល់ឲ្យព្រះអង្គម្ចាស់ ស៊ីសុវត្ថប៉ាណារ៉ាសេរីវុឌ្ឍ វិញ ប៉ុន្តែលិខិតនោះអាជ្ញាធរមិនទទួលស្គាល់ឡើយ ព្រោះជាលិខិត និងហត្ថលេខាក្លែងក្លាយ ។ ទើបព្រះអង្គម្ចាស់ ស៊ីសុវត្ថ ប៉ាណារ៉ាសេរីវុឌ្ឍ ក៏បានដាក់ពាក្យបណ្ដឹងមកក្រសួងមហាផ្ទៃ ហើយសមត្ថកិច្ចនគរបាលព្រហ្មទណ្ឌ ក៏បានស្រាវជ្រាវរកឃើញថា ជាលិខិត និងហត្ថលេខាក្លែងក្លាយមែន ក៏ចាប់ខ្លួនលោក ឯម អេង បញ្ជូនមកតុលាការឃុំខ្លួនអស់រយៈពេល ៨ខែមកហើយ ទើបតុលាការលើកយកមកកាត់ទោសនេះ៕ស តារា
