សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់ភ្លាមៗនៅកន្លែង និងក្មេងស្រីម្នាក់ទៀតបានរងរបួសស្រាលដោយសារករណីគ្រោះថ្នាក់ចរាចរណ៍រវាងម៉ូតូ២គ្រឿង បើកប៉ះគ្នាបណ្ដាលឲ្យដួលខ្ទាតលើផ្លូវចៃដន្យក៏មានរថយន្តមកពីក្រោយចាប់ហ្វ្រាំងមិនទាន់ ក៏កិនចំក្បាលបង្កការភ្ញាក់ផ្អើលតែម្ដង ។
ហេតុការណ៍នេះ បានកើតឡើងកាលពីថ្ងៃសុក្រ១១កើត ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១២ ខែកក្កដា ២០១៩វេលាម៉ោង៥:១០នាទីល្ងាច នៅលើផ្លូវលេខ៣១៦A ស្ថិតក្នុងភូមិបុស្សក្រសាំង សង្កាត់ព្រៃអង្គុញ ក្រុងបាវិតខេត្តស្វាយរៀង ។
បើតាមសមត្ថកិច្ចនគរបាលក្រុងបាវិតបានឲ្យដឹងថា បុរសដែលស្លាប់មានឈ្មោះសំ ស៊នអាយុ៤៨ឆ្នាំ ជនជាតិខ្មែរ មុខរបរកសិករ មានទីលំនៅភូមិត្រពាំងស្បូវ ឃុំព្រៃតាអី ស្រុកស្វាយទាប ខេត្តស្វាយរៀង ខណៈជិះម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខ ស្វាយរៀង ១D៨០៥៦ ខូចខាតយ៉ាងដំណំ ។
ចំណែកក្មេងស្រីដែលរងរបួសមានឈ្មោះហាយ យានរស្មី អាយុ១៤ឆ្នាំ ជនជាតិខ្មែរ មុខរបរសិស្ស មានទីលំនៅភូមិចំការលាវ ឃុំព្រៃគគី ស្រុកចន្រ្ទា ខេត្តស្វាយរៀង ។
ប្រភពបន្តថាចំណែកអ្នកបើករថយន្តមិនត្រូវបានស្គាល់ឈ្មោះនោះទេក្រោយកើតហេតុបើករថយន្តគេចខ្លួនបាត់ស្រមោលភ្លាមៗផងដែរ ។
បើតាមសាក្សីបានឲ្យដឹងថាមុនកើតហេតុមានម៉ូតូមួយគ្រឿង ម៉ាកហុងដា សេ១២៥ ពណ៌ខ្មៅ ពាក់ស្លាកលេខស្វាយរៀង១D៨០៥៦ក្នុងទិសដៅពីកើតទៅលិចលើផ្លូវលេខ៣១៦Aខណះនោះក៏បានបុកប៉ះ និងម៉ូតូមួយគ្រឿងម៉ាកហុងដា(ស៊ីទី)ពណ៌ក្រហម គ្មានស្លាកលេខ បើកបរដោយក្មេងស្រីសិស្សសាលាធ្វើដំណើរពីលិចទៅកើតបញ្រាស់គ្នាពេញទំហឹងបណ្ដាលឲ្យបុរសអ្នកបើកម៉ូតូម៉ាកហុងដា១២៥ខ្ទាតមកលើទ្រូងផ្លូវហើយចៃដន្យក៍មានរថយន្ដមួយគ្រឿងមិនស្គាល់ម៉ាកបើកបរពីកើតទៅលិចចាប់ហ្វ្រាំងមិនទាន់ក៏បានបើកកិនចំក្បាលបណ្ដាលឲ្យស្លាប់នៅកន្លែងកើតហេតុតែម្ដង ។
បច្ចុប្បន្នសាកសពត្រូវបានសមត្ថកិច្ចបានធ្វើកំណត់ហេតុប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី
និងយកក្មេងស្រីដែលរងរបួសមកសម្រាកព្យាបាលនៅមន្ទីរពេទ្យបង្អែកជីភូក្រុងបាវិត ។ ចំណែក មធ្យោបាយធ្វើដំណើរទាំង២គ្រឿងសមត្ថកិច្ចវាស់វែង និងអូសយកមករក្សាទុកនៅប៉ុស្តិ៍រដ្ឋបាលព្រៃអង្គុញ ដើម្បីចាត់ការបន្តតាមច្បាប់ ៕ យឹម សុថាន
