សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ចោរឆក់កាបូបម្នាក់ ត្រូវបានសមត្ថកិច្ចឃាត់ខ្លួន បន្ទាប់ពីធ្វើសកម្មភាពឆក់កាបូបលុយ និងទូរស័ព្ទពីស្ត្រីម្នាក់បានសម្រេចមួយចំអិនកំពឹសរួចមក ។
ក្រោយឃាត់ខ្លួន សមត្ថកិចដកហូតសម្ភារប្រគល់ឲ្យមចាស់វិញចំណែកជនសង្ស័យរៀបចំសំណុំរឿងចាត់ការតាមច្បាប់ ។
ការឃាត់ខ្លួននេះ ធ្វើឡើងកាលពីថ្ងៃអាទិត្យ ៥រោច ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី ២១ ខែកក្កដា ឆ្នាំ២០១៩ វេលាម៉ោង ១២ និង ៣០នាទី នៅចំណុចភូមិបន្លាស្អិត ឃុំរលាំងចក ស្រុកសំរោងទង ខេត្តកំពង់ស្ពឺ ។ ជនសង្ស័យមានឈ្មោះ សាន រី ភេទប្រុស អាយុ ៣៥ឆ្នាំ រស់នៅភូមិ ឃុំ ខាងលើ ។
បើតាមប្រភពបានឲ្យដឹងថា ការឃាត់ខ្លួននេះ ធ្វើឡើងដោយកម្លាំងព្រហ្មទណ្ឌស្រុក សហការជាមួយប៉ុស្ដិរលាំងចក និងកម្លាំងការិល័យព្រហ្មទណ្ឌកម្រិតធ្ងន់ ។
ជនសង្ស័យត្រូវបានឃាត់ពាក់ព័ន្ធករណីលួចមានស្ថានទម្ងន់ទោស ដោយបានឆក់កាបូប ដែលមានទូរស័ព្ទ ១គ្រឿង ម៉ាកអាយហ្វូន ពណ៌ទឹកប្រាក់ ពីឈ្មោះ ស៊ឹម ឡុងនី ភេទស្រី អាយុ ៣៥ឆ្នាំ រស់នៅភូមិត្រពាំងថ្ម ឃុំរលាំចក ស្រុកសំរោងទង ខេត្តកំពង់ស្ពឺ ខណ:ជនរងគ្រោះកំពុងជិះម៉ូតូ នៅតាមផ្លូវជាតិលេខ១៣០ ស្ថិតនៅខាងលិចភូមិព្រីង ឃុំរលាំងចក ស្រុកសំរោងទង ខេត្តកំពង់ស្ពឺ កាលពីវេលាម៉ោង ១២ និង ០០នាទី ។
ក្រោយឃាត់ខ្លួនសមត្ថកិច្ចដកហូតបាន កាបូប ១ ទូរស័ព្ទជនរងគ្រោះ ១គ្រឿង និងម៉ូតូជនសង្ស័យ ១គ្រឿង ម៉ាកហុងដា ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ ភ្នំពេញ 1CQ.1792 ទូរស័ព្ទ ១គ្រឿង ម៉ាកសាំស៊ុង ។
ក្រោយពីសាកសួរជនសង្ស័យខាងលើ បានឆ្លើយសារភាពថា ខ្លួនពិតជាបានឆក់យកកាបូបពីជនរងគ្រោះខាងលើពិតប្រាកដមែន ។
ករណីខាងលើជំនាញ បានកសាងសំណុំងឿងចាត់ការតាមនីតិវិធី ៕ សេនាស័ក្តិ
