នគរបាលព្រហ្មទណ្ឌក្រសួងមហាផ្ទៃ ចាប់ខ្លួនបុរសជនជាតិចិនម្នាក់ ពាក់ព័ន្ធករណី ឆបោក

ភ្នំពេញ ៖ ជនជាតិចិនម្នាក់ ត្រូវបានកម្លាំងនគរបាលព្រហ្មទណ្ឌក្រសួងមហាផ្ទៃ ចាប់ខ្លួននៅមុខសាលាដំបូងរាជធានីភ្នំពេញ នាំចូលក្នុងរថយន្តភ្លាមៗ បន្ទាប់ពីបុរសរូបនេះពាក់ព័ន្ធករណីឆបោកប្រាក់ ។

ហេតុការណ៍នេះ បានកើឡើងកាលពីវេលាម៉ោង១១ព្រឹក ថ្ងៃព្រហស្បតិ៍ ៨កើត ខែស្រាពណ៍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៨ សីហា ឆ្នាំ២០១៩ ស្ថិតនៅចំណុចមុខសាលាដំបូងរាជធានីភ្នំពេញ តាមបណ្ដោយផ្លូវព្រះមុន្នីរ៉េត ស្ថិតក្នុងសង្កាត់វាលវង្ស ខណ្ឌ៧មករា រាជធានីភ្នំពេញ ។

ជនសង្ស័យដែលសមត្ថកិច្ចចាប់ខ្លួនឈ្មោះ GUO GENG HE ភេទប្រុស អាយុប្រហែល៤០ឆ្នាំ ជាជនជាតិចិន ស្នាក់នៅអាគារ DBLY Tower ផ្លូវម៉ាសុីនទឹក ភូមិ៣ សង្កាត់ជ្រោយចង្វា ខណ្ឌឬស្សីកែវ រាជធានីភ្នំពេញ ។

យោងតាមប្រភពពីមន្រ្តីនគរបាលព្រហ្មទណ្ឌក្រសួងមហាផ្ទៃ បានឲ្យដឹងថា ការចាប់ខ្លួនជនជាតិចិនខាងលើនេះ គឺធ្វើឡើងតាមដីកាបញ្ជាឲ្យចូលខ្លួនរបស់លោក ប្លង់ សុផល ព្រះរាជអាជ្ញារងអមសាលាដំបូង រាជធានីភ្នំពេញ ដើម្បីធ្វើការសាកសួរពាក់ព័ន្ធ និងបទល្មើស ឆបោក តាមបណ្តឹងរបស់ឈ្មោះ MAO YI FAN ។

បច្ចុប្បន្នជនសង្ស័យ ត្រូវបានកម្លាំងនគរបាលបញ្ជូនខ្លួនទៅក្រសួងមហាផ្ទៃ ដើម្បីបន្តនីតិវិធីច្បាប់ ៕ស រស្មី