សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ ជនសង្ស័យម្នាក់ ពាក់ព័ន្ធនឹងករណីលួចម៉ូតូ ត្រូវបានសមត្ថកិច្ចចាប់ឃាត់ បញ្ជូនមកអធិការដ្ឋាននគរបាល ក្រុងសួង កសាងសំណុំរឿងតាមនីតិវិធី ក្រោយទទួលបានបណ្តឹងផ្ទាល់មាត់រាយការណ៍ប្រាប់ ។
ជនរងគ្រោះប្រាប់សមត្ថកិច្ចថា អំពើលួចប្រព្រឹត្តឡើងកាលពីវេលាម៉ោង ៩និង៣០នាទី ថ្ងៃទី១០ ខែសីហា ឆ្នាំ២០១៩ នៅចំនុចផ្សារលក់ បន្លែ ស្ថិតនៅភូមិ សួងលិច សង្កាត់សួង ក្រុងសួង ខេត្តត្បូងឃ្មុំ ។
សមត្ថកិច្ចឲ្យដឹងថា ជនសង្ស័យឈ្មោះ តាក់ តយ ភេទប្រុស អាយុ៣៨ឆ្នាំ មានទីលំនៅភូមិ អង្កោល ឃុំសូភាស ស្រុកស្ទឹងត្រង់ ខេត្តកំពង់ចាម បានធ្វើសកម្មភាព លួចយកម៉ូតូ១គ្រឿង ម៉ាកវ៉េវអាល់ហ្វា ពណ៌ សំបកឪឡឹក ស៊េរីឆ្នាំ2006 លេខតួ 239449 លេខម៉ាសីុន 0239563 (អត់ពន្ធ) ជាកម្មសិទ្ធិរបស់ជនរងគ្រោះឈ្មោះ ស្រីុន សុភា ភេទប្រុស អាយុ៤៥ឆ្នាំ មានទីលំនៅភូមិ ជ្រៃបិទមាស សង្កាត់សួង ក្រុងសួង ខេត្តត្បូងឃ្មុំ ។
សមត្ថកិច្ចបញ្ជាក់ថា ការឃាត់ខ្លួនជនសង្ស័យ នេះបានរួមទាំងម៉ូតូមកវិញ ដោយសារជនរងគ្រោះដេញតាម និងរាយការណ៍ជូនសមត្ថកិច្ចទាន់ពេល ទើបមានលទ្ធភាពឃាត់ខ្លួន បញ្ជូនមកអធិការដ្ឋាននគរបាល ក្រុងសួង កសាងសំណុំរឿងតាមនីតិវិធី ៕ វណ្ណៈ
