សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ ឥទ្ធិពលថ្នាំញៀនដល់កម្រិត យុវជនម្នាក់ប្រើប្រាស់ថ្នាំញៀនដល់កម្រិតយកកាំបិតចុងស្រួចមកចាក់ទៅលើបុរសវ័យចំណាស់ម្នាក់ ចំនួន២កាំបិតបណ្តាលឲ្យរងរបួស ។
ហេតុការណ៍នេះបានកើតឡើងកាលពីវេលាម៉ោង១៩និង៤០នាទី នៅថ្ងៃទី១៣ ខែសីហា ឆ្នាំ២០១៩ នៅចំណុចផ្ទះរបស់ឈ្មោះ ក្រូច ពោធិ៍ ភេទប្រុស អាយុ ៤១ឆ្នាំ ក្នុងភូមិទី៧ សង្កាត់កំពង់ធំ ក្រុងស្ទឹងសែន ខេត្តកំពង់ធំ។
សមត្ថកិច្ចបានឲ្យដឹងថា ជនបង្កបានប្រើហិង្សាដោយចេតនា ដោយប្រើកូនកាំបិតចិតបន្លែចុងស្រួច ចាក់ទៅលើជនរងគ្រោះ ឈ្មោះ ប៉ិច ឌីណាល់ ហៅកឹម ភេទប្រុស អាយុ ៦១ឆ្នាំ មុខរបរមន្ត្រីចូលនិវត្តន៍ រស់នៅភូមិ/សង្កាត់ កន្លែងកើតហេតុខាងលើ បណ្តាលឲ្យរបួសចំនួន២កន្លែង។
ជនសង្ស័យឈ្មោះ វ៉ន ពន្លក ភេទប្រុស អាយុ ២៩ឆ្នាំ មុខរបរមិនពិតប្រាកដ រស់នៅភូមិ សង្កាត់ជាមួយគ្នា (ជាមុខសញ្ញាធ្លាប់ជាប់ពន្ធនាគារ) ។ មូលហេតុដោយជនសង្ស័យ ជាមនុស្សញៀនថ្នាំ (រហូតដល់បែកថ្នាំ) ។
ក្រោយកើតហេតុសមត្ថកិច្ចបានឃាតខ្លួនជនបង្ក និងប្រមូលវត្ថុតាង កូនកាំបិតចិតបន្លែចុងស្រួចដងជរ័ពណ៌លឿងចំនួន១ ។ បច្ចុប្បន្នជនសង្ស័យត្រូវបានសមត្ថកិច្ចចាប់ឃាត់ខ្លួន ដើម្បីកសាងសំណុំរឿងតាមនីតិវិធី ៕ ប៊ុនរិទ្ធី
