សារព័ត៌មាន នគរវត្ត តែងតែនាំមុខគេជានិច្ច
បាតុកម្មប្រឆាំងរដ្ឋាភិបាលឥណ្ឌូនេស៊ី នៅតំបន់ Papuan កើនឡើងខ្ពស់ ដោយពេលនេះមានការផ្ទុះអាវុធ បណ្តាលឲ្យបាតុករ ៦នាក់ស្លាប់ ។ ការបាញ់ខាលើកើតឡើងក្រោយពេល ក្រុមបាតុករព្យាយាមរុលចូលទៅក្នុងអគារ នៃការិយាល័យរដ្ឋាភិបាលមួយកន្លែង ស្ថិតនៅតំបន់ Deiyai នៅថ្ងៃទី២៨ ខែសីហា ឆ្នាំ២០១៩ នេះ ។
នាយកប្រតិបត្តិគាំទ្រឯករាជ្យ សហព័ន្ធចលនារំដោះ West Papua លោក Markus Haluk បានបញ្ជាក់ប្រាប់រ៉យទ័រតាមទូរស័ព្ទថា ការបាញ់ប្រហារ នៅតែបន្តកើតមានឡើង នៅពេលឥឡូវនេះ ។ យើងមិនទាន់ដឹងថា តើមានជនរងគ្រោះមានប៉ុន្មាននាក់នៅទីនោះទេ ។
លោក Dedi Prasetyo អ្នកនាំពាក្យប៉ូលិសជាតិរបស់ឥណ្ឌូនេស៊ី បានច្រានចោលព័ត៌មាន ពីការបាញ់សម្លាប់ហ្វូងបាតុករ ហើយលោកចាត់ទុកថា នេះជាព័ត៌មានបង្កហេតុ ។ អ្នកនាំពាក្យដដែល បានបញ្ជាក់ថា ព័ត៌មានដែលជឿទុកចិត្តបាននោះ គឺមានតែប្រភពព័ត៌មាន ចេញមកពីប៉ូលិស នៅក្នុងតំបន់ Papuan តែប៉ុណ្ណោះ ។
អ្នកនាំពាក្យកម្លាំងទាហាន នៅតំបន់ Papuan លោក Eko Daryanto បានថ្លែងថា មន្ត្រីប៉ូលិសខ្លះបានរងរបួស ដោយសារការបាញ់ព្រួញ ។ លោកបានប្រាប់សារព័ត៌មាន រ៉យទ័រ តាមទូរស័ព្ទថា “យើងមិនទាន់ដឹងថា តើមានជនរងគ្រោះប៉ុន្មាននាក់ទេ ពីព្រោះការប្រាស្រ័យទាក់ទងពីទីនោះ នៅមានកម្រិត” ។
ប្រជាជនរាប់ពាន់នាក់ រស់នៅក្នុងខេត្ត Papua នាភាគខាងកើតបំផុត នៃប្រទេសឥណ្ឌូនេស៊ី បាននាំគ្នាតវ៉ា ចំពោះការរើសអើងជនជាតិភាគតិច ចាប់តាំងពីសប្តាហ៍មុនមកម្ល៉េះ ដោយក្រុមបាតុករ បាននាំគ្នាដុតផ្សារ, ដុតពន្ធនាគារ និងការិយាល័យរដ្ឋាភិបាល ជាដើម ។
បាតុកម្មនេះ បានផ្ទុះឡើង ដោយសារការប្រកាន់ជាតិសាសន៍មួយចំពោះនិស្សិត Papuan ដែលរងការវាយប្រហារដោយឧស្ម័នបង្ហូរទឹកភ្នែក នៅក្នុងអន្តេវាសិកដ្ឋានរបស់ពួកគេ និងត្រូវចាប់ឃុំខ្លួន នៅក្នុងទីក្រុង Surabaya ដែនកោះចាវ៉ា របស់ឥណ្ឌូនេស៊ី កាលពីថ្ងៃទី១៧ ខែសីហា ។ ប៉ុន្តែការប្រមូលផ្តុំតវ៉ាមួយចំនួន បានរាលដាល ទាមទារផ្តាច់ខ្លួន ឯករាជ្យ និងការបោះឆ្នោត ថែមទៀតផង ។
កម្លាំងសន្តិសុខប្រហែល ១ ២០០នាក់ ត្រូវបញ្ជូនទៅកាន់តំបន់ខាងលើបន្ថែមទៀត ខណៈវត្តមានកម្លាំងយោធាជាច្រើននាក់ មាននៅទីនោះស្រាប់ ។ តំបន់នោះ ជាទីតាំងកើតមានជម្លោះ ទាមទារផ្តាច់ខ្លួន ចេញពីប្រទេសឥណ្ឌូនេស៊ីរាប់ទសវត្សរ៍កន្លងមកហើយ ។
ទីក្រុង ចាការតា បានកាត់ផ្តាច់ បណ្តាញអ៊ីនធើរណេតទៅកាន់តំបន់នោះ កាលពីសប្តាហ៍មុន ដើម្បីបញ្ឈប់ប្រជាជនចែកចាយសារ បង្កហេតុ នាំឲ្យកើតឡើងអំពើហិង្សាទ្រង់ទ្រាយធំ ។ វិធានការនេះ បានទទួលរងការរិះគន់យ៉ាងខ្លាំង ពីសំណាក់ក្រុមសិទ្ធិមនុស្ស ក៏ដូចអ្នកសារពេ័ត៌មាន ដែលលំបាកលំបិន នៅក្នុងការទទួលបានព័ត៌មាន ពីក្នុងតំបន់នោះ៕
