អ្នកបើកបរស្រវឹងស្រា បានបើករថយន្តធ្លាក់ប្រឡាយទាំងកណ្ដាលយប់ ព្រឹកឡើងទើបយកចេញ

ភ្នំពេញ៖ បុរសជនជាតិចិនម្នាក់ស្រវឹងស្រា បានបើករថយន្តធ្លាក់ប្រឡាយ តែសំណាងល្អមិនបង្កឲ្យមនុស្សណាម្នាក់រងរបួសនៅទេ ហេតុការណ៍កើតឡើងកាលពីវេលាម៉ោង១២ រំលងអធ្រាត្រ ឈានចូលថ្ងៃទី២១ ខែកញ្ញា ឆ្នាំ២០១៩ ស្ថិតនៅតាមផ្លូវបេតុង ក្នុងភូមិប្រកាស សង្កាត់ព្រៃស ខណ្ឌដង្កោ ។

បើប្រភពព័ត៌មានពីប្រជាពលរដ្ឋដែលបានឃើញហេតុការណ៍បានប្រាប់ឲ្យដឹងថា នៅមុនពេលកើតហេតុគេឃើញជនជាតិចិនម្នាក់បើករថយន្តម៉ាកធុនត្រា ពណ៌ទឹកមាស មិនឃើញស្លាកលេខ ក្នុងល្បឿនលឿនតាមផ្លូវបេតុងខាងលើទិសដៅពីជើងទៅត្បូង ស្រាប់មកដល់កើតហេតុដោយសារផ្លូវកោងបត់រថយន្តមិនទាន់ក៏ជ្រុលធ្លាក់ទឹកប្រឡាយតែម្ដង ។

ប្រភពបន្តទៀតថា ភ្លាមៗនោះក៏មានអ្នកជិតខាងបានមកជួយវាយបំបែកកញ្ចក់រថយន្តដើម្បីជួយយកអ្នកបើករថយន្តចេញមកក្រៅ ដើម្បីជួយសង្គ្រោះអ្នកបើកបររថយន្តចេញមកទើបដឹងថា ជាជនជាតិចិនថែមទាំងស្រវឹងស្រាជោកជាំទៀតផង​ មួយសន្ទុះក្រោយមកស្រាប់មានរថយន្តសេរីទំនើបមួយគ្រឿងទៀតបានយកដឹកអ្នកបើករថយន្តដែលធ្លាក់ទឹកយកទៅបាត់​ ។

លុះព្រឹកឡើងសមត្ថកិច្ចមូលដ្ឋានបានចុះទៅពិនិត្យកន្លែងកើតហេតុដោយសារតែរថយន្តមិនបង្កមានគ្រោះថ្នាក់ដល់អាយុជីវិតនិងខូចខាតសម្បត្តិរដ្ឋទើបសមត្ថកិច្ចរង់ចាំឲ្យម្ចាស់រថយន្តមកស្ទូចយករថយន្តទៅជួសជុលដោយខ្លួនឯង ៕ ភារ៉ា ដង្កោ