សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ត្រូវបាសមត្ថកិច្ចឃាត់ខ្លួន និងបក្ខពួក២នាក់ទៀតរត់គេចខ្លួនបាត់ ក្រោយធ្វើសកម្មភាពឆក់កាបូបលុយពីនារីម្នាក់កំពុងធ្វើដំណើរតាមម៉ូតូកង់បី បានសម្រេចហើយ ជនរងគ្រោះស្រែកឆោឡោ បង្កការភ្ញាក់ផ្អើលកាលពីម៉ោង៣រសៀលថ្ងៃទី៣០ ខែកញ្ញា ឆ្នាំ២០១៩ នៅតាមផ្លូវ២០០៤ ក្បែរស្តុប កែងផ្លូវណតប្រីដ ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបាន ឈ្មោះ សុខ ចាន់ឌី អាយុ១៨ឆ្នាំ មុខរបរមិពិតប្រាកដ ស្នាក់នៅ ភូមិមច្ឆា សង្កាត់ ស្ទឹងមានជ័យ១ ខណ្ឌមានជ័យ ដកហូតបានម៉ូតូ មួយគ្រឿងម៉ាកហុងដា និច ពណ៌ស ដោះស្លាកលេខចេញ ។ ចំណែកជនរងគ្រោះ ឈ្មោះ ហ៊ូ សុខផេង អាយុ២០ឆ្នាំ មុខរបរ ជាងអ៊ុតសក់ ស្នាក់នៅភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ ។
តាមសម្តីនារីរងគ្រោះ បានឲ្យដឹងថា មុនកើតហេតុ នាងរួមដំណើរជាមួយមិត្តភក្តិ ជិះម៉ូតូកង់បី ត្រឡប់មកពីទិញឥវ៉ាន់ នៅផ្សារបឹងកេងកងវិញធ្វើដំណើរ តាមផ្លូវ២០០៤ ខណៈមកដល់ចំណុចកើតហេតុ ស្រាប់តែមានជនសង្ស័យគ្នា៣នាក់ បើកម៉ូតូនិចពីរគ្រឿង មួយគ្រឿងពណ៌ខៀវ ជិះគ្នា២នាក់ និងម្នាក់ទៀតជិះ និចពណ៌ស តាមពីក្រោយ ឆក់យកកាបូបស្ពាយទៅបាត់ ក្នុងនោះបានលុយជាង២០០ដុល្លារ លុយខ្មែរមួយចំនួន និងឯកសារមួយចំនួនទៀត ភ្លាមនោះជនរងគ្រោះបានស្រែកឆោឡោលឺដល់ សមត្ថកិច្ចល្បាតក្បែរនោះ ជួយដេញតាម ចាប់បានជនសង្ស័យម្នាក់ និងម៉ូតូមួយគ្រឿង ចំណែកជនសង្ស័យ២នាក់ទៀត រត់គេចបាត់ យកទាំងកាបូបទៅជាមួយផង ។
បន្ទាប់ពីកើតហេតុជនសង្ស័យបានម្នាក់ សមត្ថកិច្ចនាំទៅសាកសួរនៅផ្នែកជំនាញខណ្ឌសែនសុខ ដើម្បីកសាងសំណុំរឿងចាត់ការបន្តតាមនីតិវិធី រីឯជនរងគ្រោះ ក៏ទៅដាក់ពាក្យបណ្តឹងផងដែរ ៕ ជ្រោយពេជ្រ
