មុខសញ្ញារកស៊ីសត្វព្រៃ ជាប់អន្ទាក់សមត្ថកិច្ច ខណៈដឹកស្វា១៣ក្បាលយកទៅលក់

ខេត្តមណ្ឌលគិរី៖ មុខសញ្ញាជួញដូរសត្វស្វាម្នាក់ត្រូវបានសមត្ថកិច្ចស្រុកកែវសីមា ឃាត់ខ្លួនបាន ខណៈធ្វើសកម្មភាពដឹកស្វា១៣ក្បាលយកទៅលក់បន្តក្នុងបទល្មើសជាក់ស្តែង។

ហេតុការណ៍បង្ក្រាបនេះធ្វើនៅព្រឹកថ្ងៃទី៥ ខែតុលា ឆ្នាំ២០១៩ត្រង់ចំណុចភូមិឆ្នែង ឃុំ ស្រែខ្ទុម ស្រុកកែវសីមា ខេត្តមណ្ឌលគិរី ។

សមត្ថកិច្ចបានឲ្យដឹងថា៖ កម្លាំងរបស់លេខាធិការដ្ឋានស្រុកកែវសីមា បានស្ទាក់ចាប់បានរថយន្តមួយគ្រឿងដឹកសត្វស្វា បើកបរដោបុរសម្នាក់ឈ្មោះ ហ៊ុយ ហួ អាយុ៣៤ឆ្នាំ ជាជនជាតិខ្មែរ បើកបររថយន្តម៉ាកឡិចស៊ីស៣៣០ ពាក់ស្លាកលេខ2R-8247។ បន្ទាប់ពីធ្វើការត្រួតពិនិត្យក្នុងរថយន្ត សមត្ថកិច្ចបានរកឃើញសត្វស្វាច្រកក្នុងថង់ចំនួន១៣ក្បាលក្នុងរថយន្ត ជាប្រភេទសត្វស្វាស្រូវ ហើយក៏ប្រគល់ទៅឲ្យជំនាញបរិស្ថានចាត់ការបន្ត ។

លោក ព្រហ្ម វិបុលរតនៈ នាយកដែនជម្រកសត្វព្រៃកែវសីមា បញ្ជាក់ថា បុរសនេះជាមុខសញ្ញាចាស់ដែលយើងបានតាមស្រាវជ្រាវយូរមកហើយ ។ ខណៈនេះ ជនសង្ស័យត្រូវឃាត់ខ្លួនកសាងសំណុំរឿងបញ្ជួនទៅតុលាការ ។ ចំណែកសត្វស្វាទាំងអស់ត្រូវយកទៅព្រលែងចូលក្នុងព្រៃធម្មជាតិវិញទាំងអស់ ៕ សហការី