សារព័ត៌មាន នគរវត្ត តែងតែនាំមុខគេជានិច្ច
អំពើហិង្សានៅកោះហុងកុងកាន់តែកើនឡើង ហើយគ្រាប់បែកសាំង និងឧស្ម័នបង្ហូរទឹកភ្នែកដ៏កក្រើក នៅទីក្រុងហុងកុង ចាប់ខ្លួនរាប់សិបនាក់ ដោយសារបាតុកម្មប្រឆាំងបម្រាមពាក់ម៉ាស់។
នៅពេលនេះពលរដ្ឋហុងកុងដែលចង់ទៅរស់នៅក្នុងក្នុងប្រទេសអៀកឡង់(Ireland) គឺត្រូវតែវិនិយោគរកស៊ីនៅក្នុងប្រទេសនេះ មានទឹកប្រាក់ចាប់ពី១លានអឺរ៉ូឡើងទៅ។
តាមសារព័ត៌មាន Bloomberg បានផ្សាយថា ក្រុមអ្នកមានទ្រព្យសម្បត្តិស្តក់ស្តម នៅកោះតៃវ៉ាន់ បាននាំគ្នាទៅសុំសិទ្ធិរស់នៅក្នុងប្រទេសអៀកឡង់ ដោយសារតែហុងកុងកំពុងតែធ្លាក់នៅក្នុងអសន្តិសុខដោយសារតែបាតុកម្ម។
ក្នុងរយៈពេល៨សប្តាហ៍កន្លងមក មាន ពលរដ្ឋប្រមាណ១០០នាក់ បានទៅរស់នៅក្នុងប្រទេស អៀកឡង់ តាមកម្មវិធីភៀសខ្លួន រកស៊ីសម្រាប់ ក្រុមអ្នកមាននៅអាស៊ី។ ដើម្បីទទួលបានលិខិតរស់នៅស្របច្បាប់ ជនភៀសខ្លួនត្រូវតែវិនិយោគទឹកប្រាក់យ៉ាងតិច១លានអឺរ៉ូ នៅក្នុងប្រទេសនេះ។
ការធ្វើបាតុកម្មប្រឆាំងរដ្ឋាភិបាលនៅកោះហុងកុង កើតឡើងតាំងពីថ្ងៃទី៩ ខែមិថុនា រហូតមកទល់ពេលនេះនៅមិនទាន់មានសញ្ញាបញ្ចប់នៅឡើយទេ ។ មិនតែប៉ុណ្ណោះបាតុកម្មមានសញ្ញាអាក្រក់ទៅៗ ពីមួយថ្ងៃទៅមួយថ្ងៃ បង្កក្តីបារម្ភយ៉ាងខ្លាំងដល់អ្នករកស៊ីនៅកោះហុងកុង ។
ពាក់ព័ន្ធនិងបាតុកម្មហិង្សា ប៉ូលិសក្នុងប្រទេសហុងកុង និងក្រុមបាតុករបានប៉ះទង្គិចគ្នាកាលពីថ្ងៃទី៦ ខែតុលា ឆ្នាំ២០១៩ ខណៈដែលបាតុកររាប់ម៉ឺននាក់បានបាតុកម្មកណ្តាលទីក្រុងហុងកុង ដើម្បីប្រឆាំងរដ្ឋាភិបាលដែលដាក់ចេញបម្រាមពាក់ម៉ាស់ ។ ប៉ូលិសហុងកុងថា អ្នកដែលរឹងទទឹងចំពោះបម្រាមនេះ នឹងត្រូវចាប់ខ្លួនដាក់ពន្ធនាគារមួយឆ្នាំ និងពិន័យជាប្រាក់ផងដែរ ។
ប៉ូលិសបានបាញ់ឧស្ម័នបង្ហូរទឹកភ្នែក ក៏ដូចប្រើប្រាស់ដំបង ដើម្បីឆ្លើយតបចំពោះក្រុមបាតុករដែលបាតុកម្មនៅច្រើនកន្លែងក្នុងទីក្រុងហុងកុង ។ ក្រុមបាតុករបានគប់គ្រវែងគ្រាប់បែកសាំង និងវត្ថុរឹងដទៃផ្សេងៗទៀតដូចជាដុំឥដ្ឋជាដើមមកលើកងកម្លាំងប៉ូលិសដែលកំពុងអនុវត្តច្បាប់ ។ ការប៉ះទង្គិចគ្នា រវាងប៉ូលិស និងក្រុមបាតុករទាំងនេះ មិនប្រកាន់ពេលវេលាយប់ថ្ងៃអ្វីឡើយ ។
ជាលើកដំបូងហើយ ស្ថិតក្រោមច្បាប់ស្តីអំពីគ្រាអាសន្នថ្មី ប៉ូលិសហុងកុងបានចាប់ខ្លួនបាតុកររាប់សិបនាក់នោះ ។ ពួកគេត្រូវចាប់ចងដៃជាមួយខ្សែ និងដោះម៉ាស់ចេញពីមុខ មុនពេលលើកដាក់លើរថយន្តដឹកចេញទៅ ។ បាតុករខ្លះទៀត ត្រូវប៉ូលិសចាប់សង្កត់ផ្កាប់មុខចុះដី គ្រពាត់ដៃមកក្រោយខ្នង(ចងស្លាបសេក) រួចចងដៃពួកគេ មុនពេលដែលបង្ក្រាបដោយការប្រើឧស្ម័នបង្ហូរទឹកភ្នែក ហើយនិងដំបង ។
និស្សិតម្នាក់ឈ្មោះ Lee បាននិយាយថា ច្បាប់ប្រឆាំងការពាក់ម៉ាស គឺជាប្រេងសាំងចាក់បញ្ឆេះឲ្យកាន់តែឆេះខ្លាំងឡើងចំពោះពួកយើង ហើយមនុស្សកាន់តែច្រើនបន្ថែមទៀត នឹងចេញដង្ហែក្បួនបាតុកម្មនៅតាមដងផ្លូវ ។ យើងមិនខ្លាចចំពោះច្បាប់ថ្មី យើងនឹងបន្តប្រយុទ្ធ ។ យើងនឹងប្រយុទ្ធ ដើម្បីសុចរិតភាព។ យើងនឹងពាក់ម៉ាស់ ដើម្បីប្រាប់រដ្ឋាភិបាលថា យើងមិនខ្លាចចំពោះអំពើជិះជាន់ឡើយ ។
គួរបញ្ជាក់ថា បាតុកម្មនៅហុងកុងបានអូសបន្លាយពេលជាង៤ខែកន្លងមកហើយ ។ ដើមឡើយពួកគេប្រឆាំងនឹងច្បាប់ស្តីអំពីបត្យាប័ន ។ ច្បាប់បត្យាប័នដែលអាចបញ្ជូនមនុស្សពីហុងកុងទៅជាប់ពន្ធនាគារនៅចិនដីគោក ដែលមកដល់ពេលនេះបានរំសាយហើយនោះ ប៉ុន្តែនៅមិនអាចធ្វើបាតុករស្ងប់ស្ងាត់ ឈប់ធ្វើបាតុកម្មបានឡើយ ។ ពួកគេបន្តទាមទារលទ្ធិប្រជាធិបតេយ្យ និងទាមទារការស៊ើបអង្កេតដោយឯករាជ្យការបង្ក្រាបរបស់ប៉ូលិសដែលពួកគេថា មានសភាពឃោរឃៅនោះ ។ បាតុកម្មពេលខ្លះបង្កឲ្យមានប៉ះទង្គិចជាបន្តបន្ទាប់ កុំថាឡើយនាំឲ្យខាតបង់សេដ្ឋកិច្ច ។ ថ្មីៗនេះ មេដឹកនាំ ហុងកុង លោកស្រីCarrie Lam បានប្រើសិទ្ធិជានាយកប្រតិបត្តិអនុម័តយ៉ាងតក់ក្រហល់បំផុត នូវបម្រាមពាក់ម៉ាស់ ពេលធ្វើបាតុកម្មរបស់ក្រុមបាតុករ ។ នៅពេលបម្រាមនេះ ប្រកាសអនុវត្តជាធរមាននោះ បានធ្វើឲ្យបាតុករខឹងសម្បា ហើយនាំគ្នាដង្ហែក្បួនប្រឆាំងបម្រាមនេះ កាន់តែទ្រង់ទ្រាយធំឡើង៕
