សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ ផ្លូវលំមួយខ្សែតភ្ជាប់ពីផ្លូវជាតិលេខ៧៨ឆ្ពោះទៅឃុំចាអ៊ុង ដែលរងការខូចខាតស្ទើរទាំងស្រុង ដោយសារទឹកភ្លៀងហូរច្រោះ នារដូវភ្លៀងធ្លាក់ ហើយមិនមានការជួសជុល ស្ថាបនាឡើងវិញនោះ ត្រូវបានលោក ប៊ូឡាំ អ្នកតំណាងរាស្ត្រមណ្ឌល ខេត្តរតនគិរី ចុះទៅមើលផ្ទាល់តាមសំណូមពរ របស់ប្រជាពលរដ្ឋ ឲ្យជួយត្រួតពិនិត្យមើលផ្លូវ ឲ្យពួកគាត់បានធ្វើដំណើរ ដឹកកសិផលឲ្យស្រួលផង ។
អ្នកតំណាងរាស្ត្រក៏បានមានប្រសាសន៍សរសើរលោកប្រធានមន្ទីរសាធារណការខេត្តរតនគិរី លោក ស៊ុន ប៉ូលីន ថាល្អណាស់ ល្អ ត្រង់អត់ចេះធ្វើការ រួចគាត់ក៏បានសំណូមពរឲ្យរដ្ឋមន្រ្តីយកមន្រ្តីគ្រាប់ល្ពៅ មិនធ្វើការនៅខេត្តរតនគិរីនោះទៅវិញផង ។
លោកបានមានប្រសាន៍បន្តថា ប្រជាពលរដ្ឋនៅខេត្តរតនគិរី គាត់មិនទទួលយកបាននោះទេដែលមន្ត្រីមិនធ្វើការ ។
ប្រជាពលរដ្ឋ នៅភូមិ ចាអ៊ុង កៅ ឃុំចាឣុង ស្រុកឣូជុំលើកដៃ អបអរសាទរ សប្បាយចិត្តយ៉ាងកក់ក្តៅ ដែលបានឃើញលោក ចុះទៅសួរសុខទុក្ខ ដល់ពួកគាត់ នឹងចុះទៅកែសម្រួលផ្លូវ ឲ្យពួកគាត់ ។
ពួកគាត់មានការសប្បាយចិត្ត យ៉ាងខ្លាំង ហើយថែមទាំងជូនពរឲ្យលោក មានសុខភាពល្អ បរិបូណ៌ ចៀសផុត ពីជំងឺ កុំឲ្យមកបៀតបៀន ដល់លោក ។
ព្រោះមានតែលោកទេ ជាម្លប់ដល់ពួកគាត់ នៅក្នុងខេត្តរតនគិរីនេះ ទីណា មានទុក្ខលំបាក គឺលោក អ្នកតំណាងរាស្រ្ត មិនខ្លាចនឿយហត់នោះទេ តែងតែចុះទៅសួរ សុខទុក្ខ និងជួយភ្លាមៗ តាមតម្រូវការ របស់ពួកគាត់ដែលឆ្លើយតបសំណូមពរកាលពីថ្ងៃទី១៥ ខែតុលា ឆ្នាំ ២០១៩កន្លងមកនេះ ។
ផ្លូវលំមួយខ្សែនេះមានប្រវែង សរុបប្រមាណជាង៥គីឡូម៉ែត្រ ដល់រម្មណីយដ្ឋាន ជ្រោះចាអ៊ុង ក្នុងនោះ ក៏មានលូជ្រុងមួយកន្លែងផង ដែលឆ្លងកាត់អូរចាអ៊ុង ប្រវែង១២ម៉ែត្រ គុណ៩ម៉ែត្រ ត្រូវដាច់ក្បាលចេញបាត់មួយចំហៀង ដោយសារទឹកហូរបុកកាលពីវេលាម៉ោង១យប់ ខែកក្កដា ឆ្នាំ២០១៩នោះមក ដែលស្ថិតនៅក្នុងភូមិ ចាអ៊ុងកៅ ឃុំចាឣុង ស្រុកអូរជុំ ខេត្តរតនគិរី ។
លោកស៊ុន ប៉ូលិណប្រធានមន្ទីរសាធារណការ និងដឹកជញ្ជូនខេត្តរតនគិរី ក៏បានចូល ខមិន ក្នុងតេលេក្រាមរួមថា “សុំជំរាបជូន ផ្លូវនេះ ជាផ្លូវធ្លាប់មានការជួសជុល ថែទាំរបស់មន្ទីរអភិវឌ្ឍន៍ជនបទ គឺមិននៅក្រោមការគ្រប់គ្រងរបស់មន្ទីរសាធារណការទេ ហើយយើងក៏មិនមានថវិកាសំរាប់ជួសជុល ដូចដូចការលើកឡើងនោះដែរ” ។
ផ្លូវមួយខ្សែនេះក៏មានប្រជា ពលរដ្ឋចំនួន៥ភូមិ ដែលជួបផលលំបាកក្នុង ការធ្វើដំណើរផងដែររួមមាន ភូមិចាអ៊ុងកៅ ភូមិចាអ៊ុងកេត ភូមិចាអ៊ុងចាន់ ភូមិធួយទុំ និងភូមិធួយអំពឹល សរុប៣៦៦១នាក់ ស្មើនិង៨៨០គ្រួសារ ព្រមទាំងភ្ញៀវទេសចរណ៍គ្រប់ជាតិសាសន៍ដែលបានធ្វើដំណើរឆ្លងកាត់ទៅទស្សនាកំសាន្តរមណីយដ្ឋានជ្រោះចាអ៊ុងជារៀងរាល់ថ្ងៃនោះផងដែរ ៕ ជីវ័ន្ត
