បុរសម្នាក់ធ្វើអត្តឃាត នៅក្នុងបន្ទប់ផ្ទះជួលនៅព្រែកលៀប

ភ្នំពេញ៖ បុរសម្នាក់ បានធ្វើអត្តឃាតចង.កសម្លាប់ខ្លួន នៅក្នុងបន្ទប់ផ្ទះជួល បង្កឲ្យការភ្ញាក់ផ្អើលទៅដល់សមត្ថកិច្ច និងបងប្អូនក្រុមគ្រួសារសាច់ញាតិ កាលពីម៉ោង ៦ និង៣០នាទីយប់ ថ្ងៃទី៣០ ខែតុលា ឆ្នាំ២០១៩ តាមបណ្តោយផ្លូវបេតុង ចំណុចបន្ទប់ជួលលេខ4Eo ស្ថិតក្នុងភូមិ៦ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ ។

ជនរងគ្រោះឈ្មោះ ង៉ែត ភារ័ត្ន អាយុ ២៦ឆ្នាំ មុខរបរជាគ្រូបង្រៀនហ្វឹកហាត់ជំនាញផ្នែករត់កីឡា ស្នាក់នៅទីតាំងកើតហេតុ មានស្រុកកំណើតនៅខេត្តកំពុងឆ្នាំង។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ មិនដឹងថា សង្សារជនរងគ្រោះចេញទៅ ខេត្តព្រះសីហនុពីពេលណានោះទេ ឃើញចាក់សោទ្វារបន្ទប់ជួលចោល លុះពេលដល់ម៉ោង ៥រសៀលថ្ងៃទី៣០ ខែតុលា ឆ្នាំ២០១៩ ជនរងគ្រោះ បានបើកម៉ូតូរបស់គាត់ មកដល់បន្ទប់ជួលសង្សារគាត់ ហើយបានអារសោទ្វារ រួចចូលទៅសំងំដេក។

លុះដល់ម៉ោងកើតហេតុ អ្នកជិតខាងសង្ស័យ ក៏តេទូរស័ព្ទទៅសមត្ថកិច្ចប៉ុស្តិ៍ព្រែកលៀបថា មានចោរគាស់បន្ទប់ជួល ទើបសមត្ថកិច្ច ក៏បានមកដល់ភ្លាមៗ ហើយចូលទៅក្នុងផ្ទះ ក៏ប្រទះឃើញជនរងគ្រោះ ចង.កស្លាប់បាត់ទៅហើយ ដោយនៅក្នុងបន្ទប់ មានកំប៉ុងស្រាបៀរ Anchor ជាច្រើន មិនដឹងថាគាត់មានរឿងអ្វីទ្បើយ បានជាធ្វើអត្តឃាតសម្លាប់ខ្លួនបែបនេះ។

បន្ទាប់ពីកើតហេតុសមត្ថកិច្ច បានប្រគល់សពទៅឲ្យបងប្អូនជនរងគ្រោះ ដឹកយកទៅធ្វើបុណ្យនៅឯស្រុកកំណើតតាមប្រពៃណី ៕ ជ្រោយពេជ្រ