សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ទំនងជាស្រវឹងស្រា បានបើករថយន្តលឿន ជ្រុលទៅបុករបាំងថ្មពុះចែកទ្រូងពេញទំហឹង បណ្ដាលឲ្យដាច់ក្រឡេកង់ទៅមុខលែងរួច ។
ហេតុការណ៍នេះ បានកើតឡើងកាលពីម៉ោង២ រំលងអធ្រាត្រ ឈានចូលថ្ងៃទី១៨ ខែវិច្ឆិកា ឆ្នាំ២០១៩ ត្រង់ចំណុចខាងត្បូងវត្តកោះ តាមបណ្ដោយផ្លូវព្រះមុនីវង្ស កែង និងផ្លូវលេខ១៨២ ស្ថិតក្នុងសង្កាត់ស្រះចក ខណ្ឌដូនពេញ ។
ប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសម្នាក់ ទំនងជាស្រវឹងស្រា បានបើករថយន្តមួយគ្រឿង ម៉ាកតូយូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2AM-5042 ធ្វើដំណើរតាមបណ្ដោយផ្លូវព្រះមុនីវង្ស ក្នុងទិសដៅពីត្បូងទៅជើងយ៉ាងលឿន ។ ខណៈមកដល់ចំណុចកើតហេតុ រថយន្តកបានរេចង្កូតជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យវៀចរបាំងថ្មមួយកង់ រីឯរថយន្តបង្ក ដាច់ក្រឡេកង់ ទៅមុខលែងរួច ។
ក្រោយកើតហេតុ អ្នកបើកបររថយន្តបង្ក បានបើកទ្វាររថយន្ត ចុះរត់គេចខ្លួនទៅបាត់ បន្សល់ទុករថយន្ត នៅកន្លែងកើតហេតុ ។
បន្ទាប់ពីកើតហេតុ សមត្ថកិច្ចមូលដ្ឋានបានចុះមកដល់ រួចរាយការណ៍ជូនសមត្ថកិច្ចជំនាញចរាចរ ឲ្យចុះមកស្ទូចយករថយន្តទៅរក្សាទុក នៅការិយាល័យចរាចរផ្លូវគោក នៃស្នងការដ្ឋាននគរបាល រាជធានីភ្នំពេញរង់ចាំដោះស្រាយ គ្នានៅពេលក្រោយ ៕ ជ្រោយពេជ្រ
