សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសម្នាក់ស្លាប់យ៉ាងអាណោចអាធ័ម ខណៈបើកបរម៉ូតូក្នុងល្បឿនលឿន ឈប់មិនទាន់ បានបុកគោយន្ដកន្រ្ដៃដែលបើកនៅខាងមុខពេញមួយទំហឹង នៅវេលាម៉ោង១៩និង២០នាទី ថ្ងៃទី១៩ ខែវិច្ឆិកា ឆ្នាំ២០១៩ លើកំណាត់ផ្លូវលេខ១៤ ស្ថិតក្នុងភូមិស្ពានដែក ឃុំព្រែកទន្លន្លាប់ ស្រុកលើកដែក ខេត្ដកណ្ដាល ។
មន្រ្ដីនគរបាលចរាចរណ៍ស្រុកលើកដែកបានឲ្យដឹងថា ជនរងគ្រោះស្លាប់ឈ្មោះ ពៅ រិទ្ធីភេទប្រុស អាយុ៣២ឆ្នាំ មានទីលំនៅភូមិបឹងកណ្ដាល ឃុំខ្ពបអាទាវ ស្រុកលើកដែក ជាង្នកបើកបរម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ1U-8987 ។ ចំណែកឯអ្នកបើកបរគោយន្ដកន្រ្ដៃពុំស្គាល់អត្ដសញ្ញាណ រត់គេចខ្លួនបាត់ស្រមោល ។
ប្រភពដដែលបន្ដថា នៅមុនពេលកើតហេតុ សាក្សីបានឃើញជនរងគ្រោះបើកបរម៉ូតូតាមបណ្ដោយផ្លូវលេខ១៤ ក្នុងទិសដៅពីជើងទៅត្បូងដោយល្បឿនលឿន ខណៈមកដល់ចំណុចកើតហេតុ ក៏បានបុកគោយន្ដកន្រ្ដៃដែលបើកនៅខាងមុខពេញមួយទំហឹង បណ្ដាលឲ្យជនរងគ្រោះជាអ្នកបើកបរម៉ូតូស្លាប់ភ្លាមៗនៅកន្លែងកើតហេតុ រីឯអ្នកបើកបរគោយន្ដវិញបានទុករថយន្ដចោល រួចរត់គេចខ្លួនបាត់ស្រមោល ។
ក្រោយពីមានហេតុការណ៍កើតឡើង សមត្ថកិច្ចជំនាញបានចុះពិនិត្យវាស់វែង រួចកសាងឯកសារដកហូតយកមធ្យោបាយពាក់ព័ន្ធទាំង២គ្រឿង យកមករក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធី ៕ ស្អាងជ័យ
