សារព័ត៌មាន នគរវត្ត តែងតែនាំមុខគេជានិច្ច
ក្រុមចោរសមុទ្រគឺជាក្តីកង្វល់បំផុត សម្រាប់នាវាដឹកនិញនានា នៅលើពិភពលោក តំបន់សមុទ្រនីហ្សេរីយ៉ា ត្រូវបានចាត់ទុកថា ជាគ្រោះថ្នាក់សម្រាប់នាវាដឹកទំនិញ ដោយក្រុមចោរសមុទ្រ តែងតែវាយប្រហារ ប្លន់នាវាដឹកទំនិញ។ តាមរបាយការណ៍ការិយាល័យច្រកសមុទ្រអន្តរជាតិបានបញ្ជាក់ថា ចាប់ពីចន្លោះខែមករា រហូតដល់ខែកញ្ញា ឆ្នាំ២០១៩នេះ ការវាយប្រហារនៅតាមច្រកសមុទ្របានកើតមានជាបន្តបន្ទាប់ ក្នុងនោះ២០ភាគរយ កើតឡើងដោយសារក្រុមចោរសមុទ្រធ្វើសកម្មភាពប្លន់នាវាដឹកទំនិញនៅក្នុងប្រទេសនីហ្សេរីយ៉ា ។
កាលពីថ្ងៃទី៤ ខែធ្នូ ឆ្នាំ២០១៩នាវាដឹកទំនិញបំពាក់ទង់ជាតិហុងកុងមួយគ្រឿង កំពុងដឹកទំនិញចេញពីឈូងសមុទ្រនីហ្សេរីយ៉ា ត្រូវបានក្រុមចោរសមុទ្រប្លន់ ហើយចាប់ជំរិតនាវិក១៩នាក់ ក្នុងនោះមានជនជាតិឥណ្ឌា និងតួកគីផងដែរ ។ ក្រុមហ៊ុនដឹកជញ្ជូនតាមច្រកសមុទ្រ ដែលជាម្ចាស់នាវាដឹកទំនិញបានអះអាងថា ការព្រួយបារម្ភចម្បង គឺក្រុមនាវិកទាំងនោះអាចវិលត្រឡប់ដោយសុខសុវត្ថិភាព ក្រៅពីនេះ គឺមិនខ្វល់ពីការខាតបង់ទំនិញនៅលើនាវានោះឡើយ ។
ក្រុមចោរសមុទ្រដែលលាក់ខ្លួននៅឆ្នេរសមុទ្រប្រទេសនីហ្សេរីយ៉ា កាលពីល្ងាចថ្ងៃទី៤ ខែធ្នូ ឆ្នាំ២០១៩ បានឡើងទៅលើនាវាផ្ទុកទំនិញពេញមួយគ្រឿង ហើយធ្វើសកម្មភាពចាប់ជំរិត សមាជិកនាវិកចំនួន១៩នាក់ដែលនៅលើនាវាដឹកទំនិញមួយគ្រឿងនោះ ។
ភ្នាក់ងារព័ត៌មាន Bloomberg បានរាយការណ៍ថា ឧប្បត្តិហេតុនេះ បានកើតឡើងប្រហែល១២៨គីឡូម៉ែត្រ ពីដែនដីកោះ ប៊ុននី (Bonny) ដែលជាកន្លែងផ្ទុកប្រេងឆៅដ៏សំខាន់របស់ប្រទេសនីហ្សេរីយ៉ា ។
អ្នកនាំពាក្យរបស់ក្រុមហ៊ុនដឹកជញ្ជូនតាមផ្លូវទឹក Navios Maritime Holdings ដែលជាម្ចាស់នាវានោះ បានប្រាប់ប្រភពព័ត៌មានថា សមាជិកនាវិកនៅតែបន្តបាត់ខ្លួននៅឡើយ មកទល់ពេលនេះ ។ អ្នកដែលមិនត្រូវបានចាប់ជំរិត អាចជិះទូកទៅកាន់ទីតាំងដែលមានសុវត្ថិភាព ។
នាវិកដប់ប្រាំបីនាកក្នុងចំណោមសមាជិកនាវិក១៩នាក់ នៅលើនាវាដឹកទំនិញបំពាក់ទង់ជាតិហុងកុងដែលត្រូវចាប់ជំរិតនោះ គឺជាជនជាតិឥណ្ឌា ហើយម្នាក់ជាជនជាតិតួកគី ។ នេះបើតាមការចេញផ្សាយព័ត៌មានរបស់កាសែត New Indian Express ។
អ្នកនាំពាក្យក្រុមហ៊ុននាវាដឹកទំនិញបាននិយាយថា “ការព្រួយបារម្ភចម្បងគឺសុវត្ថិភាព និងការវិលត្រឡប់របស់មនុស្សទាំង ១៩ នាក់ ដែលត្រូវបានចាប់ខ្លួន ដោយក្រុមចោរសមុទ្រ” ។ អាជ្ញាធរទាំងអស់ ដែលពាក់ព័ន្ធ រួមទាំងស្ថាប័នរដ្ឋផងដែរ ត្រូវបានប្រកាសអាសន្ន ហើយបាននិងកំពុងឆ្លើយតប រាល់សកម្មភាពដែលចាំបាច់ទាំងអស់ ដើម្បីធានានូវសុខសុវត្ថិភាព និងការដោះលែងពួកគេឲ្យបានឆាប់ៗបំផុត ៕
