សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានករណីគ្រោះអគ្គិភ័យមួយបានកើតឡើង ដោយសារឆ្លងចរន្តអគ្គិសនីបណ្ដាលឲ្យឆាបឆេះកន្លែងដាក់អាសនៈ នៅផ្ទះជាន់ទី១ ទល់មុខផ្សារនាគមាស បង្កការភ្ញាក់ផ្អើលដល់ពលរដ្ឋរាយការណ៍ប្រាប់សមត្ថកិច្ចមូលដ្ឋានទំនាក់ទំនងទៅនគរបាលពន្លត់អគ្គិភ័យចុះមកជួយធ្វើអន្តរាគមន៍ភ្លាមៗ ។
ហេតុការណ៍គ្រោះអគ្គិភ័យខាងលើនេះ បានកើតឡើងកាលពីវេលាម៉ោង១ និង៤០នាទីរសៀល ថ្ងៃទី៥ ខែធ្នូ ឆ្នាំ២០១៩ ស្ថិតនៅចំណុចផ្ទះលេខ១០CE ជាន់ទី១ ទល់មុខផ្សារនាគមាស តាមបណ្ដោយផ្លូវលេខ៣១៦ សង្កាត់ផ្សាររដើមគ ខណ្ឌទួលគោក ។
តាមប្រភពព័ត៍មានពីប្រជាពលរដ្ឋរស់នៅក្បែរកន្លែងកើតហេតុ បានឲ្យដឹងថា មុនពេលកើតហេតុ គេឃើញមានផ្សែងហុយចេញពីផ្ទះជាន់ទី១ ដែលចាក់សោទុកចោលគ្មានម្ចាស់ផ្ទះនៅនោះទេ ភ្លាមនោះអ្នកជិតខាងបាននាំគ្នាផ្អើលឆោឡោនាំគ្នាយកទុយោទឹក និងខ្លះទៀតយកបំពង់ពន្លត់អគ្គិភ័យទៅជួយបាញ់ទប់ស្កាត់ រួចរាយការណ៍ជូនអាជ្ញាធរមូលដ្ឋានឲ្យហៅរថយន្តពន្លត់អគ្គិភ័យមកជួយធ្វើអន្តរាគមន៍បាញ់ពន្លត់ទាន់ពេលវេលា ។
ប្រភពដដែលបន្តថា បន្ទាប់ពីកម្លាំងសមត្ថកិច្ចមូលដ្ឋានបានទទួលព័ត៍មានភ្លាម ពេលនោះបានទំនាក់ទំនងទៅកម្លាំងការិយាល័យពន្លត់អគ្គិភ័យ ចេញរថយន្តមកជួយបាញ់ពន្លត់ភ្លាមៗ ដោយមិនរាលដាលដល់ផ្ទះពលរដ្ឋដទៃនោះទេ ។
ក្រោយកើតហេតុអគ្គិភ័យនោះបានរលត់ទៅវិញនៅវេលាម៉ោង២និង៥០នាទីរសៀលថ្ងៃដដែល ដោយប្រើប្រាស់រថយន្តពន្លត់អគ្គិភ័យអស់ចំនួន១គ្រឿង ។ ដោយសមត្ថកិច្ចបានបញ្ជាក់ថា ករណីអគ្គិភ័យនេះ គឺបណ្ដាលមកពីឆ្លងចរន្ថអគ្គិសនីនៅកន្លែងដាក់អាសនៈ ៕ ជ្រោយពេជ្រ
