សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅថ្ងៃទី១៩ ខែធ្នូ នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ទូលថ្វាយ សម្តេចក្រុមព្រះ ព្រះប្រធានគណបក្សហ៊្វុនស៊ិនប៊ិច ឲ្យពន្យារពេលសមាជវិសាមញ្ញ សិន រហូតសម្របសម្រួលដោះស្រាយបញ្ហាផ្ទៃក្នុងបាន ។
យោងតាមលិខិតរបស់សម្តេច ស ខេង បានឲ្យដឹងថា ក្រសួងមហាផ្ទៃបានទទួលនូវលិខិតជូនដំណឹង ស្តីពីការរៀបចំធ្វើសមាជវិសាមញ្ញរបស់គណបក្សហ៊្វុនស៊ិនប៊ិច ដែលគ្រោងនឹងរៀបចំឡើងនៅថ្ងៃទី២៣ ខែធ្នូ ឆ្នាំ២០១៩ ខាងមុខនេះ ។
ពាក់ព័ន្ធនឹងករណីនេះ ក្រសួងមហាផ្ទៃស្នើឲ្យគណបក្សហ៊្វុនស៊ិនប៊ិច ពន្យារពេលនៃការរៀបចំសមាជវិសាមញ្ញរបស់គណបក្សជាបណ្តោះអាសន្នសិន រហូតដល់គណបក្សបានសម្របសម្រួលដោះស្រាយបញ្ហាផ្ទៃក្នុងរបស់គណបក្សចប់សព្វគ្រប់ជាមុនសិន ។
ទន្ទឹមនឹងនេះ ក្រសួងមហាផ្ទៃ ស្នើសុំឲ្យគណបក្សត្រូវអនុវត្តតាមប្រការ២៤ នៃលក្ខន្តិកៈរបស់គណបក្សដែលបានតម្កល់ទុកនៅក្រសួងមហាផ្ទៃ និង លិខិតលេខ១៥២៥ ចុះថ្ងៃទី១០ ខែកញ្ញា ឆ្នាំ២០១៨ របស់ក្រសួងមហាផ្ទៃ ៕ចេស្តា
