សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានទុកម៉ូតូមួយគ្រឿងក្នុងបរិវេណផ្ទះដោយចាក់សោរបងត្រឹមត្រូវមិនត្រឹមតែប៉ុណ្ណោះបានចាក់សោ.ក និងចាក់ច្រវាក់ថែមតែទៀតរួចចូលសម្រាន្តបាត់លុះព្រឹកឡើងចុះមកយកម៉ូតូទៅធ្វើការស្រាប់តែបាត់ហើយឃើញសោរបងចំហរទើបដឹងថា ចោរលួចយកទៅបាត់ បង្កការភ្ញាក់ផ្អើលកាលពីវេលាម៉ោង៦ព្រឹក ថ្ងៃទី២៦ ខែធ្នូ ឆ្នាំ២០១៩ នៅផ្ទះលេខ១១៦ ផ្លូវបេតុង ក្រុម៦ ភូមិត្រពាំងល្វា សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះឈ្មោះចិន កក្កដា ភេទប្រុស អាយុ២៨ឆ្នាំ មុខរបរបុគ្គលិកក្រុមហ៊ុន JIC ស្នាក់នៅកន្លែងកើតហេតុ ម៉ូតូដែលចោរលួចទៅបាត់នោះម៉ាកហុងដា ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1DO7309 ។
តាមសម្តីជនរងគ្រោះបានឲ្យដឹងថា នៅល្ងាចថ្ងៃទី២៥ ខែធ្នូ ឆ្នាំ២០១៩ រូបគាត់បានយកម៉ូតូទុកក្នុងរបរក្នុងបរិវេនផ្ទះ ដោយចាក់សោរបង ថែមទាំងចាក់សោ.កម៉ូតូ និងសោច្រវាក់ត្រឹមត្រូវហើយបានឡើងទៅលើផ្ទះសម្រាកបាត់ ។
ជនរងគ្រោះបន្តថា លុះព្រឹកថ្ងៃទី២៦ រូបគាត់បានចុះមកយកម៉ូតូដើម្បីជិះទៅធ្វើការស្រាប់តែបាត់ម៉ូតូ និងឃើញស្នាមកាត់សោរបងចំហរថែមទៀតទើបគិតថាមានជនសង្ស័យចូលមកលួចយកទៅ ។
បើតាមការឆែកកាមេរ៉ាសុវត្តិភាពឃើញថា ជនសង្ស័យមានគ្នា២នាក់ជិះម៉ូតូមួយគ្រឿងមិនស្គាល់ម៉ាកហើយបានធ្វើសកម្មភាពកាត់សោរបងចូលលួចម៉ូតូពិតប្រកដមែន ។
ក្រោយកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលចោមចៅទី២ដើម្បីងាយស្រួលដល់សមត្ថកិច្ចស្រាវជ្រាយតាមចាប់ជនសង្ស័យយកមកដាក់ទោសតាមច្បាប់ ៕ សុខាសែនជ័យ
