សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ រថយន្តក្រុងដឹកអ្នកដំណើររបស់ក្រុមហ៊ុនវៀតណាមឈ្មោះ អាញ់អ្ហ៊ីវ លួចបង្កប់ និងដឹកជញ្ជូនសត្វព្រៃ ជាប្រភេទសត្វកាំប្រម៉ាចំនួន២ក្បាល ទម្ងន់ ១៥គីឡូក្រាមឆ្លងដែនពីកម្ពុជាចូលទៅប្រទេសវៀតណាម ត្រូវបានសមត្ថកិច្ចស្ទាក់ចាប់កាលពីល្ងាចថ្ងៃទី២៥ ខែធ្នូឆ្នាំ ២០១៩ នៅលើកំណាត់ផ្លូវជាតិលេខ៧៨ ក្បែរមូលដ្ឋានកងរាជអាវុធហត្ថស្រុកបរកែវ ស្ថិតក្នុងភូមិគ្លិៈ ឃុំស៊ើង ស្រុកបរកែវខេត្តរតនគិរី ។
ប្រភពពីសមត្ថកិច្ចបានឲ្យដឹងថា រថយន្តក្រុងរបស់ក្រុមហ៊ុន អាញ់អ្ហ៊ីវ ដឹកជញ្ជូនសត្វព្រៃឆ្លងដែនខុសច្បាប់ខាងលើនេះ មានពណ៌ស ពាក់ស្លាកលេខ 81B-010-64 ។ មានអ្នកបើកបរជនជាតិវៀតណាមឈ្មោះ ប៊ូម វ៉ាន់លុក ភេទប្រុស អាយុ ៤១ឆ្នាំ ។
ក្រោយពីសមត្ថកិច្ចជំនាញសួរនាំ អ្នកបើកបររថយន្តដឹកជញ្ជូនសត្វព្រៃឆ្លងដែនខាងលើនេះហើយ ក៏បានឃាត់រថយន្ត និងសត្វព្រៃជាបណ្តោះអាសន្នរក្សាទុកនៅស្នាក់ការរដ្ឋបាលព្រៃឈើបរកែវរង់ចាំដោះស្រាយតាមនីតិវិធី។
មានរថយន្តក្រុងទេសចរណ៍លួចដឹកជញ្ជូនសាច់សត្វព្រៃឆ្លងដែនខុសច្បាប់នេះ ក៏នៅមានរថយន្តក្រុងវៀតណាមជាច្រើនទៀតក្នុងក្រុងបានលុងដែលពួកគេបានលួចបង្កប់ឈើដឹកជញ្ជូនឆ្លងដែនស្ងាត់ៗយូរណាស់មកហើយ។
សមត្ថកិច្ចគ្រប់ជំនាញពាក់ព័ន្ធ ក៏កំពុងតែរិតបន្តឹងឆែកឆេរថយន្តក្រុងវៀតណាម ដែលចរាចរណ៍លើកំណាត់ផ្លូវជាតិ៧៨(ពីក្រុងបានលុង_ទៅកាន់ប្រទេសវៀតណាមតាមផ្លូវច្រកទ្វារព្រំដែនអូរយ៉ាដាវ) នេះយ៉ាងសកម្មផងដែ រ៕ ជីវ័ន្ត
