សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តកាមរីហាយប្រ៊ីតមួយគ្រឿងម្ចាស់បើកលឿនមិនប្រយ័ត្ន ជ្រុលបុកក្បាលនាគពុះចែកផ្លូវ បណ្ដាលឲ្យខ្ទាតចេញពីជួរមួយកង់ចំណែក២កង់ទៀតរងការខូចខាតដោយឡែករថយន្តក្រឡាប់អូសជិត១០០ម៉ែត្រសំណាងមិនមានមនុស្សរងរបួស ។
ហេតុការណ៍នេះ បានកើតឡើងនៅវេលាម៉ោង៤និង១០នាទីទៀបភ្លឺ ថ្ងៃទី១៥ ខែមករា ឆ្នាំ២០២០ ចំនុចផ្លូវម៉ៅសេទុង កែង និងផ្លូវ១៩៣ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មាន ពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្តបង្កម៉ាក កាមរីហាយប្រ៊ីត ពណ៌ស ពាក់ស្លាកលេខ ភ្នំពេញ 2BE 7632 និងមានបុរស២នាក់ទៀតរួមដំណើរជាមួយ ធ្វើដំណើរតាមផ្លូវ ម៉ៅសេទុង ក្នុងទិសដៅ ពីត្បូងទៅជើង ក្នុងល្បឿនល្បឿន លុះមកដល់ចំណុចកើតហេតុ ក៍ជ្រុលទៅបុក និងក្បាលនាគពុះចែកផ្លូវពេញទំហឹង បណ្តាលឲ្យខ្ទាតចេញពីជួរមួយកង់ចំណែក២កង់ទៀតរងការខូចខាតដោយឡែករថយន្តបង្កបានក្រឡាប់អូសជិត១០០ម៉ែត្រ តែមិនមានមនុស្សរងរបួស ។
ក្រោយពេលកើតហេតុ ឃើញមានកម្លាំងសមត្ថកិច្ចមូលដ្ឋាន និងជំនាញចរាចរណ៍ខណ្ឌបានចុះទៅកន្លែងកើតហេតុ រួចហើយក៏ហៅរថយន្តមកស្ទូចយករថយន្តមកទៅ រក្សាទុកនៅការិយាល័យនគរបាលចរាចរណ៍ជើងគោករាជធានីភ្នំពេញដើម្បីរង់ចាំដោះស្រាយ ៕ សុខាសែនជ័យ
