សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្ដរមានជ័យ៖ ស្លាប់ម្នាក់ និងរបួសធ្ងន់ម្នាក់ នៅក្នុងហេតុការណ៍គ្រោះចរាចរណ៍ រវាងម៉ូតូ នឹងគោយន្ដកន្ត្រៃ មានផ្ទុកឈើ នៅវេលាម៉ោង២២និង៣០នាទី ថ្ងៃទី៣ ខែកុម្ភៈ ឆ្នាំ២០២០ ស្ថិត នៅចំណុច ភូមិឃ្លាំងកណ្ដាល ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
សមត្ថកិច្ចបានឲ្យងថា គ្រោះថ្នាក់ចរាចរណ៍ រវាងគោយន្តកន្រ្តៃ នឹងម៉ូតូ បានបង្កឡើងដោយ អ្នកបើកបរគោយន្តកន្រ្តៃឈ្មោះ សោម ថុនា ភេទប្រុស អាយុ៣៣ឆ្នាំ មុខរបរធ្វើស្រែ រស់នៅ ភូមិសន្តិភាព ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។ ដោយសារគោយន្តអស់ប្រេងសាំង ក៏ឈប់នៅលើចិញ្ចើមផ្លូវ មិនបានដាក់សញ្ញាសម្គាល់ ឬចំណាំងផ្លាត ឬសញ្ញាចរាចរអ្វីឡើយ ។ ជូនពេលនោះ ជនរងគ្រោះមានគ្នា០២នាក់ ជិះម៉ូតូមួយគ្រឿងម៉ាក វ៉េវពណ៌ខ្មៅ គ្មានស្លាកលេខ ក្នុងទិសដៅពីត្បូងទៅជើង មកដល់ចំណុចកើតហេតុ ក៏មើលមិនឃើញក បានបុកពីក្រោយគោយន្តកន្រ្តៃ ឈប់នៅលើចិញ្ចើមផ្លូវពេញមួយទំហឹង ។
ជនរងគ្រោះ ឈ្មោះ ម៉ៅ សេងឆៃ ភេទប្រុស អាយុ២១ឆ្នាំ មុខរបរកម្មករ រស់នៅភូមិ ឃុំ កើតហេតុ រងរបួសធ្ងន់ បច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែកស្រុកអន្លង់វែង និងឈ្មោះ ខៀវ ម៉ៃ ភេទប្រុស អាយុ៣០ឆ្នាំ មុខរបរមន្រ្តីសាលាឃុំត្រពាំងប្រីយ៍ រស់នៅភូមិ ឃុំកើតហេតុខាងលើ ស្លាប់ពេលបញ្ជូនទៅដល់មន្ទីរពេទ្យបង្អែកខេត្តសៀមរាប។
បច្ចុប្បន្ន សពជនរងគ្រោះត្រូវបានគ្រួសារយកមកធ្វើបុណ្យតាមប្រពៃណី ចំណែកវត្ថុតាងបានយកមករក្សានៅអធិការដ្ឋាននគរបាលស្រុកអន្លង់វែង ៕ ប៉ែន នួន
