សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ: រថយន្តដឹកប្រេងដាក់ក្នុងប៊ីដុងមួយគ្រឿង ខណៈម្ចាស់កំពុងបើកបរសុខៗ ទំនងជាឆ្លងចរន្តភ្លើង បានក្លាយជាអគ្គិភ័យឆេះយ៉ាងសន្ធោសន្ធៅគ្មានសល់ ។
ហេតុការណ៍នេះបានកើតឡើង កាលពីវលាម៉ោង៥ ល្ងាច ថ្ងៃ អង្គារ ១០ រោច ខែ មាឃ ឆ្នាំកុរ ព.ស.២៥៦៣ ត្រូវនឹងថ្ងៃទី១៨ ខែកុម្ភ: ឆ្នាំ២០២០ នៅ ត្រង់ចំណុចភូមិសុបិន ឃុំព្រៃអំពក ស្រុកគិរីវង់ ខេត្តតាកែវ។
អ្នកភូមិសុបិន បានឲ្យដឹងថា រថយន្តនេះម៉ាកហ៊ីយ៉ាន់ដៃ ពណ៌ស ស្លាកលេខ ភ្នំពេញ 2A-4810 បើកបរដោយឈ្មោះ ជិន ជឿន ភេទប្រុស អាយុ៣៥ មានទីលំនៅ ឃុំ ខាងលើឆ្នាំ មានផ្ទុកប្រេងម៉ាស៊ូតចំនួន ៥០ ប៊ីដុង និងប្រេងសាំងចំនួន០២ ប៊ីដុងនៅលើរថយន្ត។ នៅមុនពេលកើតហេតុ រថយន្តនេះបានដឹកប្រេងឥន្ធនៈច្រកក្នុងប៊ីដុង ជាច្រើនប៊ីដុងដើម្បីយកទៅលក់រាយនៅឯផ្ទះ។ លុះពេលធ្វើដំណើរមកដល់ចំណុចកើតហេតុ ស្រាប់តែឆ្លងចរន្ដភ្លើងអាគុយ បណ្ដាលឲ្យឆេះជាអណ្តាតភ្លើងយ៉ាងសន្ធោសន្ធៅខូចខាតរថយន្ត សម្ភារ: និង ប្រេងឥន្ធនៈនៅលើរថយន្តនោះទាំងស្រុងតែម្តង។ រីឯម្ចាស់ជាអ្នកបើកបរបានបើកទ្វាររត់ចេញទាន់មិនមានរងរបួសនោះទេ។
ក្រោយមក កម្លាំងជំនាញពន្លត់អគ្គិភ័យរបស់អធិការដ្ឋាននគរបាលស្រុកបានចេញរថយន្តបាញ់ទឹកពន្លត់អស់១ រថយន្តទើបភ្លើងរលត់ជាស្ថាពរ តែមហន្តរាយរថយន្តនិងសម្ភារៈអស់ទៅហើយ ៕ ប្រាថ្នា
