សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងនគរបាលខណ្ឌដូនពេញ បានឃាត់ម៉ូតូកែច្នៃបំពង់ស៊ីមុំាងខុសបច្ចេកទេស ជាបន្តបន្ទាប់បានចំនួន៥៨គ្រឿង យកមករក្សាទុកនៅអធិការខណ្ឌ ដើម្បីធ្វើកិច្ចសន្យាអប់រំឲ្យដូរបំពង់ស៊ីមុំាងធម្មតាវិញ ទើបអនុញ្ញាតឲ្យយកម៉ូតូវិញបាន។
លោកវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញ បានឲ្យដឹងនៅថ្ងៃទី២៤ ខែមេសា ឆ្នាំ២០២០នេះថា ដោយអនុវត្តន៍តាមគោលការណ៍ដឹកនាំរបស់ លោកឃួង ស្រេង អភិបាលនៃគណៈអភិបាលរាជធានីភ្នំពេញ និងលោក ស ថេត អគ្គស្នងការរងនិងជាស្នងការនគរបាលរាជធានីភ្នំពេញ ឲ្យគណៈបញ្ជាការឯកភាពខណ្ឌដូនពេញ ដាក់ការត្រួតពិនិត្យនឹងឃាត់លើមធ្យោបាយរថយន្ត ម៉ូតូគ្រប់ប្រភេទប្រើប្រាស់ស៊ីមុំាងបំពងសំឡេងខុសប្រក្រតី (ប្រែន.ប្រែន) ដើម្បីយកមកអប់រំណែនាំដល់ម្ចាស់យានយន្តឲ្យផ្លាស់ប្ដូរ នឹងបញ្ឈប់ការប្រើប្រាស់ស៊ីមុំាងខុសប្រក្រតីនាំឲ្យប៉ះពាល់សណ្តាប់ធ្នាប់សាធារណៈក្នុងសង្គម រំខានការរស់នៅ នឹងសម្រាកដល់ស្ថានទូត ភ្ញៀវជាតិ អន្តរជាតិ វិនិយោគ ទេសចរណ៍ នឹងប្រជាពលរដ្ឋ ក្នុងរាជធានីភ្នំពេញ។
លោកអធិការបញ្ជាក់ថា ជាលទ្ធផលនៃការអនុវត្តន៍បទបញ្ជា ក៏ដូចជាចំណាត់ការក្នុងវិធានការណ៍នេះ សមត្ថកិច្ចបានត្រួតពិនិត្យនឹងឃាត់បានចំនួន ៥៨គ្រឿង ដោយក្នុងនោះ យើងបានឲ្យម្ចាស់យានយន្ត ធ្វើកិច្ចសន្យាបញ្ឈប់ការប្រើប្រាស់ប្រភេទស៊ីមុំាងបំពងសំឡេងរួចយកស៊ីមាំងដើម(ធម្មតា)មកផ្លាស់ប្តូរ នឹនឹងប្រគល់យានយន្តជូនម្ចាស់យានយន្តវិញ។
លោកអធិការខណ្ឌដូនពេញ បានបញ្ជាក់ទៀតថា ពាក់ព័ន្ធនឹងការឃាត់យានយន្តដែលបំពាក់បំពងមុំាងស៊ីខុសប្រក្រតីនេះបើសិនជាម្ចាស់យានយន្តនៅតែបំពានហើយនៅតែបំពាក់បំពងស៊ីមុំាងរបៀបខុសបច្ចេកទេសទៀតនោះ ហើយបើសិនណាកម្លាំងយើងឃាត់បានលើកក្រោយទៀតនឹងមិនអនុញ្ញាតឲ្យយកត្រឡប់ទៅវិញនោះទេ ដោដោយចាត់ការបន្តតាមនីតិវិធី៕ដោយ៖ជ្រោយពេជ្រ
