សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រោយជ្រកក្រោមទ្រនំផលិតកម្មទីក្រុងភាពយន្ត ឬ Town អស់រយៈពេលជាច្រើនឆ្នាំតារាចម្រៀងល្បីឈ្មោះ ខេម បានសម្រេចចិត្តស្ពាយបង្វិចចេញពីផលិតកម្មនេះហើយ ដែលទ្រនំបន្ទាប់គឺជាផលិតកម្មរបស់លោកឧកញ៉ាវ័យក្មេង គឺផលិតកម្ម Galaxy Navatra។
តារាចម្រៀងខេម មានឈ្មោះពិតថា ប៉ុន សុណារិន ត្រូវបានគេទម្លាយថាបានដើរចេញពីផលិតកម្មថោនដែលលោកធ្លាប់ជ្រកអស់១ទសវត្សរ៍មកហើយនេះបន្ទាប់ពីមានការភ្ញាក់ផ្អើលកាលពីឆ្នាំមុនថាតារាចម្រៀងរូបនេះបានបញ្ចប់ការងារពីផលិតកម្មនេះព្រោះតែអន់ចិត្តនឹងការមិនយកចិត្តទុកដាក់ និងមិនមានបទថ្មីល្អដូចពេលមុន។ ទោះមិនទាន់មានការបញ្ចេញបទចម្រៀងនៅផលិតកម្មថ្មីជាផ្លូវការក្តីក៏តាមប្រភពដែលជិតដិតនឹងអ្នកនិពន្ធម្នាក់នៅផលិតកម្ម Galaxy Navatra បានលើកឡើងថា ខេម ពិតជាចាកចេញពីផលិតកម្មTown មែនគឺរយៈពេលជាច្រើនខែមកហើយ។ ប្រភពបន្តថាបទចម្រៀងថ្មីរបស់ ខេម ក៏ត្រៀមបញ្ចេញក្នុងពេលដ៏ខ្លីខាងមុខនេះផងដែរ។ ប្រភពដដែលលើកឡើងដែរថា ការចាកចេញរបស់ខេម ពីផលិតកម្មចាស់ អាចចាត់ទុកថាជាការអស់និស្ស័យ ស្របពេលដែលទំនាក់ទំនងរបស់តារាចម្រៀងរូបនេះ និងថៅកែផលិតកម្ម Galaxy Navatra ចាប់ផ្តើមជិតស្និទ្ធខ្លាំងឡើង ពិសេសក្នុងរយៈពេល២ឆ្នាំចុងក្រោយនេះ ហើយតារាចម្រៀងរូបនេះនឹងក្លាយជាគ្រាប់ពេជ្រថ្មីរបស់ផលិតកម្មនេះ។
មានការលើកឡើងដែរថា ខេម ជាតារាចម្រៀងល្បី មានសមត្ថភាព អាចនឹងនៅតែរក្សាបានប្រជាប្រិយភាពជួរមុខដដែល ខណៈផលិតកម្មថ្មីក៏ប្រមូលផ្តុំដោយអ្នកនិពន្ធឆ្នើម ដែលអាចបន្តរុញច្រានឲ្យតារាចម្រៀងវ័យ៣៥ឆ្នាំរូបនេះលេចមុខមាត់ជាថ្មីម្តងទៀត។
គួរបញ្ជាក់ដែរថា ចូលប្រឡូកក្នុងអាជីពសិល្បៈចាប់ពីអំឡុងឆ្នាំ២០០៧ ដោយលោកចូលរួមក្នុងកម្មវិធីមួយរបស់ទូរទស្សន៍CTN ។ ក្រោយទទួលបានជ័យលាភី ជាតារាចម្រៀងឆ្នើមលោកក៏ចាប់ផ្តើមមានឱកាសចេញច្រៀង ដោយចាប់ផ្តើមមានអ្នកស្គាល់តាមរយៈការច្រៀងជាក្រុមមួយឈ្មោះថា Boy Band ។ ក្រោយចប់កុងត្រា១ឆ្នាំ នៅទូរទស្សន៍ CTN លោកបានចូលច្រៀងនៅផលិតកម្ម Time ប៉ុន្តែហាក់មិនទទួលបានការជោគជ័យ។ ក្រោយចប់កិច្ចសន្យាជាមួយផលិតកម្មនេះ ក្នុងឆ្នាំ២០១០ លោកបានចាប់ផ្តើមចូលច្រៀងក្នុងផលិតកម្មTown រហូតក្លាយជាតារាចម្រៀងលំដាប់ជួរមុខមួយនៅកម្ពុជា៕ដោយ៖វឌ្ឍនា
