សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ខណៈដែលរដ្ឋាភិបាលឥណ្ឌា បានចោទប្រកាន់រដ្ឋាភិបាលចិនថា៖ជាអ្នកបង្កបញ្ហាជម្លោះថ្មីៗនៅតាមព្រំដែនដោយបំពាន ។ស្រាប់តែកងទ័ពចិនបានប្រតិកម្មវិញភ្លាមៗ កាលពីថ្ងៃទី៣១ ខែសីហា កន្លងទៅថ្មីៗនេះ ដោយបានចេញសេចក្តីថ្លែងការណ៍មួយ ទាត់ចោលការចោទប្រកាន់របស់ឥណ្ឌាជុំវិញសកម្មភាពនៅព្រំដែន។ ដោយយោធាចិន បានអះអាងថា យោធាខ្លួនមិនបានធ្វើសកម្មភាពបង្ករឿង ដូចការចោទប្រកាន់របស់ភាគីឥណ្ឌានោះទេផ្ទុយទៅវិញ កងទ័ពឥណ្ឌាទៅវិញទេ ដែលបានឆ្លងខ្សែបន្ទាត់ព្រំដែនគ្រប់គ្រងជាក់ស្តែង (LAC) ចូលមកក្នុងទឹកដីចិន។ មិនតែប៉ុណ្ណោះកងទ័ពចិន ក៏បានសង្កត់ធ្ងន់ថា មានតែចាត់វិធានការមួយចំនួន ដើម្បីការពារទឹកដីរបស់ខ្លួនប៉ណ្ណោះ។
បើតាមអ្នកនាំពាក្យទីបញ្ជាការភូមិភាគខាងលិចរបស់កងទ័ពរំដោះប្រជាជនចិន បានអះអាងនៅក្នុងសេចក្តីថ្លែងការណ៍ថា កងទ័ពឥណ្ឌា បានបំពានការឯកភាពគ្នា ដោយឆ្លងខ្សែបន្ទាត់គ្រប់គ្រងជាក់ស្តែង នៅថ្ងៃទី៣១ ខែសីហាថ្មីៗនេះ «ការចល័តទ័ពដោយភាគីឥណ្ឌា បានបំពានអធិបតេយ្យដែនដីរបស់ចិន និងបំផ្លាញសន្តិភាព និងស្ថិរភាពយ៉ាងធ្ងន់ធ្ងរនៅតាមព្រំដែនឥណ្ឌា ចិន»។ អ្នកនាំពាក្យយោធាចិន បានបន្ថែមថាដោយសារសកម្មភាពកងទ័ពឥណ្ឌាកងទ័ពចិន ក៏ចាត់វិធានការតបវិញ ដើម្បីការពារទឹកដី និងស្ថិរភាពនៅតាមព្រំដែន។
បើតាមការចុះផ្សាយរបស់កាសែតហុងកុង South China Morning Post ដោយដកស្រង់សេចក្តីថ្លែងការណ៍ដដែល បានបញ្ជាក់ថារដ្ឋាភិបាលចិនក៏បានទទូចឲ្យឥណ្ឌាដកកងទ័ពរបស់ខ្លួន ដែលបានឈរជើងដោយខុសច្បាប់និងគោរពតាមគោលការណ៍របស់កងទ័ពនៅតាមតំបន់ព្រំដែនជួរមុខ។
ដោយឡែកជុំវិញបញ្ហានេះដែរ កាលពីថ្ងៃទី៣១ ខែសីហា ក្រសួងការពារជាតិឥណ្ឌា បានអះអាងថា ចិនបានចល័តទ័ពនៅតាមព្រំដែនជាថ្មីដែលនេះជាសកម្មភាពបង្ករឿង និងចង់ផ្លាស់ប្តូរស្ថានភាពបច្ចុប្បន្ន។ ហេតុការណ៍ថ្មីនេះបានកើតឡើង នៅភាគខាងត្បូងនៃជ្រោយទន្លេPangong Tso ស្ថិតក្នុងតំបន់Ladakh។
ចំណែកក្រសួងការបរទេសចិនវិញ អ្នកនាំពាក្យ លោក Zhao Lijian បានអះអាង កងទ័ពចិន មិនដែលឆ្លងកាត់ខ្សែបន្ទាត់ព្រំដែនគ្រប់គ្រងជាក់ស្តែងចូលទៅក្នុងទឹកដីឥណ្ឌា ដើម្បីសកម្មភាពណាមួយទេ។ យ៉ាងណាក៏ដោយភាពតានតឹងតាមព្រំដែននេះ ត្រូវបានមេបញ្ជាការកងទ័ពទាំងពីរចរចាគ្នាហើយ។
គួររម្លឹកផងដែរថា កាលពីខែមិថុនាកន្លងទៅ កងទ័ពឥណ្ឌា និងកងទ័ពចិនបានប៉ះទង្គិចគ្នា ដោយហេតុការណ៍នោះ បានទាហានឥណ្ឌា បានបាត់បង់ជីវិតចំនួន ២០នាក់ និងរបួសជាច្រើននាក់ ខណៈចិន មិនបញ្ចេញរបាយការណ៍។ ប៉ុន្តែការប្រឈមមុខនេះ ត្រូវបានកាត់បន្ថយទៅវិញបន្ទាប់ពីកងទ័ពប្រទេសទាំងពីរ បានជួបចរចាគ្នារហូតដល់ទៅ ៣លើក ។
សូមជម្រាបថា បន្ទាប់ពីការចោទប្រកាន់របស់ឥណ្ឌា កងទ័ពចិនក៏បានចេញសេចក្តីថ្លែងការណ៍មួយ ដើម្បីការពារខ្លួនពីការចោទប្រកាន់របស់ឥណ្ឌាផងដែរ ៕ដោយ៖ស តារា
