សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖សត្វគោមួយក្បាលក្នុងចំណោមសត្វគោមួយហ្វូងបានងាប់ភ្លាមៗខណៈម្ចាស់លែងចោលហេីយរត់ឆ្លងផ្លូវត្រូវរថយន្តក្រុងរបស់ក្រុមហ៊ុន ភ្នំពេញ សូរិយា ដឹកជញ្ជូនអ្នកដំណេីរ១៦៨បេីកបុក កាលពីវេលាម៉ោង៨និង៥០នាទីព្រឹក ថ្ងៃទី២៤ ខែកញ្ញា ឆ្នាំ២០២០ ស្ថិតនៅតាមបណ្តោយផ្លូវជាតិលេខ៣ ក្បែរខ្លោងទ្វារវត្តអង្គត្រគៀត ក្នុងសង្កាត់កន្ទោក ខណ្ឌកំបូល រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុរថយន្តក្រុងរបស់ក្រុមក្រុមហ៊ុន ភ្នំពេញ សូរិយា ដឹកជញ្ជូនអ្នកដំណើរ168 ពណ៌ក្រហមលាយស ពាក់ស្លាកលេខ ភ្នំពេញ3E-9601 កំពុងដឹកអ្នកដំណើរក្នុងទិសដៅពីជើងទៅត្បូង ពេលមកដល់ចំណុចកើតហេតុស្រាប់តែមានសត្វគោមួយហ្វូងប្រហែលជា១០ក្បាល បានរត់ឆ្លងផ្លូវពីកើតទៅលិចបណ្តាលឲ្យអ្នកបើករថយន្តវាក់អឺ ជាន់ហ្វ្រ័ងមិនទាន់ហើយភ្លាមនោះមានគោញីមួយក្បាលពណ៌សបានរត់មកចំពីមុខរថយន្តត្រូវរថយន្តបុកបណ្តាលឲ្យខ្ទាតងាប់ភ្លាមៗ ។
បន្ទាប់ពីកើតហេតុតៃកុងរថយន្តបានស្វែងរកម្ចាស់គោដែរតែរកមិនឃើញ។
ក្រោយកើតហេតុសមត្ថកិច្ចមូលដ្ឋានបានចុះទៅដល់ទីតាំងកើតហេតុនិងទាក់ទងតាមបណ្តាភូមិដើម្បីស្វែងរកម្ចាស់គោឲ្យមកដោះស្រាយជាមួយខាងរថយន្ត។
មតិប្រជាពលរដ្ឋដែលធ្វើដំណើរឆ្លងកាត់តាមបណ្តោយផ្លូវខាងលើបាននិយាយថាភាគច្រើនសត្វគោទាំងនោះម្ចាស់តែងតែលែងចោលជាហ្វូងៗឲ្យដើរស៊ីស្មៅដោយគ្មានខ្សែឬកន្លុះទេ ប្រៀបដូចជាសត្វដែលគ្មានម្ចាស់អ៊ីចឹង ហើយបើមានការបាត់បង់នោះតែងតែរត់រកអាជ្ញាធរឲ្យជួយស្វែងរក តែបើមានបញ្ហាដូចខាងលើ គឺរកម្ចាស់មិនដែលឃើញទេគឺលាក់មុខជិតតែម្តង។
ដូច្នេះប្រជាពលរដ្ឋដែលមានសត្វគោហើយចូលចិត្តលែងទាំងហ្វូងនោះសូមមានទំនួលខុសត្រូវរាល់បញ្ហាដែលកើតមានជាក់ស្តែងដូចករណីខាងលើគឺរកម្ចាស់គោមិនឃើញសោះ៕
ដោយ៖ សុខាសែនជ័យ
