សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ តំបន់ទេសចរណ៍ប្រវត្តិសាស្ត្រមួយដ៏អស្ចារ្យកាត់ថ្លៃមិនបានរបស់ប្រទេសកម្ពុជា គឺខេត្តសៀមរាប ដែលទាក់ទាញភ្ញៀវទេសចរជាតិ និងអន្តរជាតិជាច្រើនលាននាក់ឲ្យទៅទស្សនារៀងរាល់ឆ្នាំ។ ដោយការកម្សាន្ត នៅខេត្តសៀមរាបមួយនេះ គឺមានច្រើនមធ្យោបាយដូចជា៖ ការធ្វើដំណើរថ្មើរជើង ការជិះកង់–ម៉ូតូ ការជិះរថយន្ត ឬការជិះទូក ជាដើម។ យ៉ាងណាមិញការគយគន់ទីក្រុងដ៏ស្រស់ស្អាតពីលើអាកាសប្រហែលជាបទពិសោធន៍ថ្មីប្លែកមួយបែបសម្រាប់មនុស្សមួយចំនួន តែមិនសម្រាប់មនុស្សទូទៅឡើយព្រោះមធ្យោបាយកម្សាន្តបែបនេះមានតម្លៃថ្លៃគួរសមណាស់ដែរ។
ដោយឡែកបើលោកអ្នកចង់ធ្វើដំណើរកម្សាន្តពីលើអាកាស នៅតំបន់ទេសចរណ៍ប្រវត្តិសាស្ត្រដ៏អស្ចារ្យមួយនេះ តាមរយៈឧទ្ធម្ភាគចក្រ តើយើងត្រូវចំណាយលុយអស់ប៉ុន្មានដែរ? ។
ជាក់ស្តែងបើយោងតាមវិបសាយទេសចរណ៍មួយដែលមានឈ្មោះថាHelicopersCambodia បានឲ្យដឹងថា ជាទូទៅ តម្លៃនៃការជិះឧទ្ធម្ភាគចក្របែងចែកទៅតាមរយៈពេលដែលភ្ញៀវជិះ។
តោះចង់ដឹងពីតម្លៃក្នុងមនុស្សម្នាក់ចែកចេញជា ៤ ដូចខាងក្រោម៖
ទី១ រយៈពេល៨នាទី តម្លៃ១០០ដុល្លារ (ទស្សនាបាន១កន្លែងគឺប្រាសាទអង្គរវត្ត)។
ទី២ រយៈពេល១៤នាទី តម្លៃ១៦៥ដុល្លារ (ទស្សនាបាន៥កន្លែង)។
ទី៣ រយៈពេល២០នាទី តម្លៃ២៤០ដុល្លារ (ទស្សនាបាន៦កន្លែង)។
ទី៤ រយៈពេល៣០នាទី តម្លៃ៣៥០ដុល្លារ (ទស្សនាបាន៧កន្លែង)៕
ដោយ៖សហការី
