សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ថៅកែក្លិបម្នាក់ និងបុគ្គលិកជាជនជាតិចិនចំនួន១០នាក់ (ស្រី ២នាក់) ត្រូវបានសមត្ថកិច្ចរៀបចំសំណុំរឿងបញ្ជូនទៅតុលាការនៅព្រឹកនេះ ចំណែកភ្ញៀវចំនួន៣៤នាក់ទៀត (ស្រី១៨នាក់ ) ត្រូវបានពិន័យក្នុងម្នាក់ចំនួន៥លានរៀលនៅក្នុងប្រតិបត្តិការបង្ក្រាបក្លិបកម្សាន្តមួយកន្លែងក្នុងខណ្ឌបឹងកេងកង កាលពីយប់ថ្ងៃទី១៨ ខែឧសភា ឆ្នាំ២០២១។
ក្នុងប្រតិបត្តិការបង្ក្រាបក្លិបកម្សាន្តមួយកន្លែងតាមបណ្តោយមហាវិថីព្រះមុនីវង្ស សង្កាត់បឹងកេងកង២ ខណ្ឌបឹងកេងកង នេះ កម្លាំងសមត្ថកិច្ចបានឃាត់ខ្លួនមនុស្សសរុបចំនួន ៤៥នាក់ ( បញ្ជូនអ្នកពាក់ព័ន្ធចំនួន១១នាក់ទៅតុលាការ និងពិន័យជាប្រាក់ក្នុងម្នាក់ចំនួន៥លានរៀល ចំនួន៣៤នាក់ចំពោះអ្នកចូលកម្សាន្តដែលល្មើសទៅនឹងបម្រាមរបស់រដ្ឋបាលរាជធានីភ្នំពេញ ស្តីពីការបង្ការ និងទប់ស្កាត់ការឆ្លងរាលដាលវីរុសកូវីដ-១៩។
ក្រោមការដឹកនាំបញ្ជាដោយផ្ទាល់របស់លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ និងមានការឯកភាពពីលោក ប្លង់ សុផល ព្រះរាជអាជ្ញាររងអមសាលាដំបូងរាជធានីភ្នំពេញ កាលពីវេលាយប់រំលងអធ្រាត្រថ្ងៃទី១៨ ឈានចូលថ្ងៃទី១៩ខែឧសភាសមត្ថកិច្ចចម្រុះនៃស្នងការដ្ឋាននគរបាលរាជធានីភ្នំពេញ បានចុះបង្ក្រាបទីតាំងក្លិបកម្សាន្តមួយឋិតនៅតាមបណ្តោយមហាវិថីព្រះមុនីវង្ស សង្កាត់បឹងកេងកង២ ខណ្ឌបឹងកេងកង ដោយបានធ្វើការឃាត់ខ្លួនមនុស្សសរុបចំនួន៤៥នាក់ ដោយមានជនជាតិចិនចំនួន២៦នាក់ (ស្រី ៧នាក់ ) ជនជាតិវៀតណាមចំនួន៧នាក់(ស្រី) ជនជាតិកូរ៉េចំនួន១នាក់(ប្រុស) ជនជាតិម៉ាឡេសុីចំនួន១នាក់(ប្រុស) និងជនជាតិខ្មែរចំនួន ១០នាក់ ( ស្រី ៥នាក់ ) ព្រមទាំងបានដកហូតវត្ថុតាងមួយចំនួន និងសារធាតុញៀនសរុបចំនួន ៣៧៩.៣២ ក្រាម និង ៨០មិល្លីលីត្រ ។
បន្ទាប់ពីដំណើរការធ្វើតេស្តរកមេរោគកូវីដ-១៩ ដោយក្រុមគ្រូពេទ្យរួចមក ជាលទ្ធផលគឺអវិជ្ជមានទាំងអស់ ហើយជំហានបន្ទាប់សមត្ថកិច្ចជំនាញនៃការិយាល័យប្រឆាំងគ្រឿងញៀនបានធ្វើតេស្តរកសារធាតុញៀនបន្តទៀត ដែលជាលទ្ធផលបានរកឃើញអ្នកដែលមានវិជ្ជមានសារធាតុញៀនចំនួន៦នាក់ និងអ្នកពាក់ព័ន្ធចំនួន៥នាក់ទៀតពាក់ព័ន្ធនឹងការប្រេីប្រាស់ ចែកចាយសារធាតុញៀន ហេីយសមត្ថកិច្ចកំពុងតែរៀបចំសំណុំរឿងបញ្ជូនជនទាំង១១នាក់នេះទៅតុលាការដើម្បីអនុវត្តបន្តតាមនីតិវិធីច្បាប់ ។
ចំណែកឯភ្ញៀវចំនួន៣៤នាក់ ( ស្រី១៨នាក់) រួមមានជនជាតិចិន១៥នាក់ ជនជាតិវៀតណាម៧នាក់ ជនជាតិខ្មែរ ១០នាក់ ជនជាតិកូរ៉េ១នាក់ និងជនជាតិម៉ាឡេសុីម្នាក់ ដែលបានទៅលេងនៅក្លិបកម្សាន្តនោះ ដែលល្មើសទៅនឹងវិធានការសុខាភិបាល គឺត្រូវបានធ្វើការពិន័យជាទឹកប្រាក់ចំនួន៥លានរៀលក្នុងម្នាក់ និងបានធ្វើកិច្ចសន្យាណែនាំអប់រំឲ្យត្រឡប់ទៅគេហដ្ឋានវិញ ៕
ដោយ៖ ជ្រោយពេជ្រ
