សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ ដោយបានការអនុញ្ញាតពីលោកឧត្ដមសេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្តកំពង់ឆ្នាំង និងមានការសម្របសម្រួលពីលោក អ៊ិត សុធា ព្រះរាជអាជ្ញាអមសាលា ដំបូងខេត្តកំពង់ឆ្នាំង កម្លាំងព្រហ្មទណ្ឌអាវុធហត្ថ ខេត្ត បានឃាត់ខ្លួនជនសង្ស័យម្នាក់ និងរឹបអូសរថយន្តមួយគ្រឿងក្នុងករណីជននេះឆបោករថយន្តគេ។
ប្រតិបត្តិការនេះធ្វើឡើងនៅថ្ងៃទី២១ ខែឧសភា ឆ្នាំ២០២១ នៅក្រុងកំពង់ឆ្នាំង ដោយធ្វើឡើងតាមពាក្យបណ្ដឹងរបស់ជនរងគ្រោះឈ្មោះ យ៉ាន់ ភារម្យ ភេទប្រុស អាយុ២៩ឆ្នាំ មុខរបរជាអ្នកលក់ដូរ រស់នៅភូមិស្រែតាជៃ ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង(ម្ចាស់រថយន្ត)។
សមត្ថកិច្ចបានឲ្យដឹងថាជនរងគ្រោះបានចាញ់បោកជនសង្ស័យឈ្មោះ ផែន សុខុម ភេទប្រុស អាយុ៣៥ឆ្នាំ រស់នៅភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ស្ថិតនៅចំណុចយានដ្ឋាន L.S ភូមិព្រៃពួច ឃុំជ្រៃបាក់ ស្រុករលាប្អៀរ ដែលខ្ចីរថយន្តរបស់គាត់យកទៅជិះ កាលពីថ្ងៃទី៣០ ខែ ឧសភាឆ្នាំ២០២០ ហើយបែរជាយកទៅបញ្ចាំឲ្យអ្នកដទៃ។
ប្រភពដដែលបានឲ្យដឹងទៀតថា ក្រោយឃាត់ខ្លួន សមត្ថកិច្ចបានរឹបអូសវត្ថុតាងរួមមាន៖
១-រថយន្ដចំនួន០១គ្រឿង ពាក់ស្លាកលេខ ស្វាយរៀង2B.7007 ពណ៌ទឹកប្រាក់ ។
២-ទូរស័ព្ទដៃចំនួន០២គ្រឿង ។
ជនសង្ស័យ និងវត្ថុតាងខាងលើ ត្រូវបានការិយាល័យជំនាញកសាងសំណុំរឿងបញ្ជូនទៅសាលាដំបូងខេត្តកំពង់ឆ្នាំង ដើម្បីបន្តនីតិវិធី ៕
ដោយ ៖ ប្រាថ្នា
