សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ បុរសជាជនពិការម្នាក់បានលង់ទឹកស្លាប់ ហើយត្រូវបានសាច់ញាតិរកឃើញនៅក្នុងទឹកអូរ ខាងក្រោយផ្ទះ បន្ទាប់ពីបាត់ខ្លួនអស់ជាច្រើនម៉ោង បង្កឲ្យមានការភ្ញាក់ផ្អើលទាំងយប់ ។
ករណីនេះកើតឡើងនៅថ្ងៃទី១៦ ខែមិថុនា ឆ្នាំ២០២១ វេលារំលងអធ្រាត្រ ស្ថិតនៅចំណុចភូមិអូរកំបុត ឃុំព្រែកខ្ពប ស្រុកឯកភ្នំ ខេត្តបាត់ដំបង ។
ប្រភពពីមន្រ្តីនគរបាលប៉ុស្តិ៍រដ្ឋបាលព្រែកខ្ពប បានឲ្យដឹងថាជនរងគ្រោះឈ្មោះ សុខ ខាន់ ភេទប្រុស អាយុ៣៤ឆ្នាំ ជាជនពិការមួយចំហៀងខ្លួនផ្នែកខាងស្តាំយូរឆ្នាំមកហើយ។ បច្ចុប្ប្នន្នរស់នៅក្រុមទី១២ ភូមិអូរកំបុត ឃុំព្រែកខ្ពប ស្រុកឯកភ្នំ ខេត្តបាត់ដំបង។
តាមការបំភ្លឺរបស់ឈ្មោះ សុខ សំណាង ភេទប្រុស អាយុ១៨ឆ្នាំ រស់នៅភូមិអូរកំបុត ឃុំព្រែកខ្ពប ស្រុកឯកភ្នំ មុខរបរ ព្រូរថយន្តត្រូវជាប្អូនបង្កើតរបស់សព បានឲ្យដឹងថា នៅយប់ថ្ងៃកើតហេតុ ខ្លួនបានជិះម៉ូតូទៅលេងខេត្តជាមួយមិត្តភកិ្ត ហើយពេលត្រឡប់មកផ្ទះវិញទៅរកមើលបងប្រុសជាជនរងគ្រោះនៅផ្ទះតែរកមិនឃើញ ។ បន្ទាប់មកខ្លួនក៏បើកភ្លើងពិលតាមទូរស័ព្ទដៃមើលទៅក្នុងអូរក្រោយផ្ទះ ស្រាប់តែឃើញស្បែកជើងបងប្រុសរបស់ខ្លួននិងឃើញជើងមនុស្ស ហើយនិងខោបងប្រុសខ្លួននៅមាត់អូរ ទើបខ្លួនដឹងថាបងប្រុសខ្លួនធ្លាក់ទឹកស្លាប់បាត់ទៅហើយ។ ភ្លាមនោះខ្លួនក៏ស្រែកហៅបងទី៥ឈ្មោះ សុខ ញែប ហើយហៅអ្នកភូមិឲ្យមកជួយស្រង់សាកសពបងប្រុសយកមកដាក់លើគោក។ លុះដល់វេលាម៉ោង០៧និង១០នាទីព្រឹក ថ្ងៃទី១៧ ខែមិថុនា ឆ្នាំ២០២១ កម្លាំងជំនាញបានចុះទៅត្រួតពិនិត្យនិងធ្វើកោសល្យវិច័យលើសាកសពតែសាកសពត្រូវក្រុមគ្រួសារបានលើកដាក់ចូលមឈូសបាត់ទៅហើយ។ ដោយមានសាក្សីអះអាងនិងយល់ឃើញថាក្រុមគ្រួសារមិនប្តឹងក្នុងករណីនេះសមត្ថកិច្ចជំនាញបានប្រគល់សាកសពជូនក្រុមគ្រួសារយកទៅធ្វើពិធីបុណ្យតាមប្រពៃណី ៕
ដោយ ៖ ប្រាថ្នា
