សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ យោងតាមសេចក្តីប្រកាសរបស់រដ្ធបាលខេត្តតាកែវនាយប់ថ្ងៃចន្ទ ៩រោច ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២ ខែសីហា ឆ្នាំ២០២១ បានឱ្យដឹងថា លោកអ៊ូច ភា អភិបាលខេត្តតាកែវ បានចុះត្រួតពិនិត្យការអនុវត្តបម្រាមគោចរនៅស្រុកត្រាំកក់ ស្រុកបាទី ស្រុកសំរោង និងស្រុកព្រៃកប្បាស ក្នុងភូមិសាស្ត្រខេត្តរបស់ខ្លួន។
នាឱកាសនោះ លោកអភិបាលខេត្តបានធ្វេីការណែនាំដល់អាជ្ញាធរមូលដ្ឋាន និងសមត្ថកិច្ចពាក់ព័ន្ធទាំងអស់ត្រូវអនុវត្តនូវបម្រាមគោចរ ជាពិសេសគឺអនុវត្តនូវវិធានការរដ្ឋបាលដែលបានដាក់ចេញដោយរដ្ឋបាលខេត្តតាមការណែនាំរបស់រាជរដ្ឋាភិបាលឱ្យបានម៉ឺងម៉ាត់បំផុត ហេីយត្រូវណែនាំដល់ប្រជាពលរដ្ឋឱ្យចូលរួមទាំងអស់គ្នា ធ្វេីយ៉ាងណាទប់ស្កាត់ និងកាត់ផ្តាច់ការឆ្លងរាលដាលជំងឺកូវីដ-១៩ បំប្លែងថ្មីប្រភេទដែលតា DELTA មកក្នុងសហគមន៍របស់យេីង ។
គួរបញ្ជាក់ថា តាមការណែនាំរបស់រាជរដ្ឋាភិបាលរ ដ្ឋបាលខេត្តតាកែវបានចេញសេខក្តីសម្រេចកាលពីថ្ងៃទី២៩ ខែកក្កដា ឆ្នាំ២០២១ ស្តីពីការអនុវត្តវិធានការរដ្ឋបាលនៅក្នុងភូមិសាស្ត្រខេត្តតាកែវ ដែលមានរយៈពេល១៤ថ្ងៃ គឺចាប់ពីថ្ងៃទី២៩ខែកក្កដា ឆ្នាំ២០២១ ដល់ថ្ងៃទី១២ ខែសីហា ឆ្នាំ២០២១ ដោយក្នុងនោះរួមទាំងហាមឃាត់ការជួបជុំ ហាមឃាត់ការលក់ដូរគ្រឿងស្រវឹង ព្រមទាំងដាក់បម្រាមគោចរចាប់ពីម៉ោង ៩យប់ ដល់ម៉ោង៣ទៀបភ្លឺជាដេីម។បើសិនបងប្អូនប្រជាពលរដ្ឋមិនគោរពតាមការណែនាំរបស់រាជរដ្ឋាភិបាលទេនោះគឺនឹងអនុវត្តតាមផ្លូវច្បាប់៕
ដោយ៖ អរុណរះ
