សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីតាមការបញ្ជាក់ពីអាជ្ញាធរខណ្ឌទួលគោក នៅថ្ងៃទី៣ ខែសីហា ឆ្នាំ២០២១នេះថា៖ ដេីម្បីទប់ស្កាត់ជំងឺឆ្លងរាលត្បាលខ្លាំង មន្រ្តីជំនាញ បានសម្រេចបិទផ្សារដើមគជាបណ្ដោះអាសន្ន ហេីយក្រុមគ្រូពេទ្យរៀបចំយកសំណាកទៅលើក្រុមអាជីវករទាំងអស់ ព្រមទាំងប្រជាពលរដ្ឋដែលបានចូលផ្សារនេះកន្លងមក។
ប្រភពដដែល បន្តថា មូលហេតុដែលអាជ្ញាធរសម្រេចបិទផ្សារដើមគ ជាបណ្ដោះអាសន្ននេះ ដោយសារតែថ្មីៗនេះ មានអ្នកជំងឺកូវីដ-១៩ ប្រភេទបំប្លែងថ្មី Delta បានចូលទៅទិញ ឥវ៉ាន់នៅទីនោះ ។
ប៉ុន្តែទោះបីជាយ៉ាងណា ពេលនេះ ក្រុមគ្រូពេទ្យកំពុងតែមមាញឹកយ៉ាងខ្លាំង ក្នុងការរៀបចំទីតាំងដើម្បីយកសំណាកទៅលើអ្នកពាក់ព័ន្ធទាំងឡាយ ហើយ លទ្ធផលយ៉ាងណាណានោះនៅមិនទាន់ដឹងឡើយទេ ។
គួរជម្រាបថា បើតាមក្រសួងសុខាភិបាល ពេលនេះវីរុសកូវីដ១៩ ប្រភេទ Delta បាននិងកំពុងរាតត្បាតចូលក្នុងសហគមន៍របស់យើងហើយ ដោយកម្ពុជាបានរកឃើញអ្នកឆ្លងជំងឺកូវីដ១៩ ប្រភេទ Delta នេះ ជាបន្តបន្ទាប់ ។ ទន្ទឹមនឹងនេះ ក្រសួងសុខាភិបាលក៏បានសង្កេតឃើញថា ការចម្លងនាពេលបច្ចុប្បន្ននេះមានសន្ទុះកើនឡើងលើយុវវ័យ ដែលក្រុមនេះ បានដើរចេញក្រៅផ្ទះច្រើននិងមានការជួបជុំមិត្តភក្តិ ។
ដូច្នេះដើម្បីបង្ការនិងទប់ស្កាត់ការរីករាលដាលកាន់តែធំឡើងទៀត សូមបងប្អូនប្រជាពលរដ្ឋទាំងអស់ ត្រូវអនុវត្ត ឲ្យបានខ្ជាប់ខ្ជួននូវវិធានការ ៣ការពារនិង៣កុំ៕ដោយ៖សហការី
